ەلىمىزدە 100 دەن استام بالا جاسى كەلسە دە مەكتەپكە بارماعان

ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتى بارىسىندا «جاڭا وقۋ جىلىنا دايىندىق بارىسىندا جاسى تولعان بالالاردىڭ مەكتەپكە بارماۋى بويىنشا قانشا فاكتى تىركەلدى؟» دەگەن ساۋال قويىلدى.
«مينيسترلىكتىڭ ءبىلىم بەرۋ ۇيىمدارى تۋرالى بۇيرىعىنا سايكەس، ورتا ءبىلىم بەرۋ مەكەمەلەرى وسىنداي فاكتىلەر انىقتالسا، ءتيىستى شارالار قابىلداۋى كەرەك. بۇگىنگى تاڭدا بالالاردىڭ مەكتەپكە بارماۋىنىڭ 105 فاكتىسى تىركەلدى جانە ول بويىنشا مينيسترلىك جۇمىس جۇرگىزىپ جاتىر. سونىمەن قاتار اتا- انالارمەن ءتۇسىندىرۋ جۇمىستارى جۇرگىزىلەدى. ەگەر ول بالالارعا قاتىستى قانداي دا ءبىر قيىندىقتار مەن پروبلەمالار بولسا، ماسەلە الەۋمەتتىك قىزمەتتەرمەن بىرلەسىپ شەشىلەدى»، - دەپ جاۋاپ بەردى وقۋ- اعارتۋ ۆيتسە- ءمينيسترى ەدىل وسپان اتالعان ساۋالعا.
ايتا كەتەيىك، «مەكتەپكە جول» رەسپۋبليكالىق اكسيا اياسىندا 450 مىڭ مۇقتاج وتباسى بالالارىنا كومەك بەرىلدى.
سونداي- اق، بريفينگ بارىسىندا اباي وبلىسىنداعى ورمان ورتىنەن زارداپ شەككەن وتباسى بالالارىنا قارجىلاي كومەك بولىنگەنى ايتىلدى.