ماگيستراتۋرا ەمتيحانىنا شپارگالكا اپارعان 100 گە جۋىق تالاپكەر وقۋعا ءتۇسۋ مۇمكىندىگىنەن ايىرىلدى
تەستىلەۋ باستالعالى 149 قاتىسۋشىنىڭ ناتيجەسى جويىلدى.
ونىڭ ىشىندە 92 وقۋعا ءتۇسۋشى سمارتفون، شپارگالكا جانە باسقا دا تىيىم سالىنعان زاتتاردى الىپ وتۋگە تىرىسقانى ءۇشىن تەست تاپسىرۋ مۇمكىندىگىنەن ايىرىلدى.
كەشەندى تەستىلەۋ كەزىندە ەرەجە بۇزعانى ءۇشىن اۋديتوريادان 57 ادام شىعارىلىپ، ولاردىڭ ناتيجەسى جويىلدى.
«ۇلتتىق ءبىرىڭعاي تەستىلەۋدەگى سەكىلدى كەشەندى تەستىلەۋگە كىرگىزۋ ءۇش دەڭگەيلى جۇيە بويىنشا جۇزەگە اسىرىلادى: Face ID جەكە باسىن سايكەستەندىرۋ ارقىلى، جەكە كۋالىك بويىنشا، سونداي-اق وتىرعىزۋ ورنىندا جەكە باسىن سايكەستەندىرۋ جۇرگىزىلەدى. قابىلدانعان شارالار ارقاسىندا تەستىلەۋدە بوگدە تۇلعالار انىقتالعان جوق»، - دەدى ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ.
ەستەرىڭىزگە سالا كەتسەك، ماگيستراتۋراعا تۇسۋگە ارنالعان كەشەندى تەستىلەۋگە 43 مىڭعا جۋىق ءوتىنىش كەلىپ ءتۇستى.
ماگيستراتۋرادا وقۋعا 13 مىڭنان استام گرانت ءبولىندى. بيىل ماگيستراتۋراعا تۇسۋگە ارنالعان كەشەندى تەستىلەۋ 22- شىلدەدە باستالدى جانە 10- تامىزعا دەيىن جالعاسادى.
بيىل ماگيستراتۋراعا ءتۇسۋ ەرەجەسى وزگەرگەن جوق. كەشەندى تەستىلەۋ ءۇش بلوكتان تۇرادى: شەت ءتىلى بويىنشا تەست، وقۋعا دايىندىعىن انىقتاۋعا ارنالعان تەست جانە ءبىلىم بەرۋ باعدارلامالارى توبىنىڭ بەيىنى بويىنشا تەست.
شەت ءتىلىن مەڭگەرگەنىن راستايتىن حالىقارالىق سەرتيفيكاتتاردىڭ ءبىرى بار وقۋعا تۇسۋشىلەر شەت ءتىلى بويىنشا تەستتەن بوساتىلادى.
تەستىلەۋ ناتيجەسىمەن كەلىسپەگەن جاعدايدا ونلاين اپەللياتسياعا بەرۋ مۇمكىندىگى قامتاماسىز ەتىلگەن.
تەستىلەۋ اياقتالعاننان كەيىن 30 مينۋت ىشىندە وقۋعا ءتۇسۋشى بىردەن اپەللياتسياعا ءوتىنىش بەرە الادى. اپەللياتسيا بەس كۇن ىشىندە قارالادى.
تەستىلەۋ سەرتيفيكاتى وقۋعا ءتۇسۋشىنىڭ جەكە كابينەتىندە قولجەتىمدى بولادى.
شەكتى بال دا وزگەرىسسىز قالدى: عىلىمي-پەداگوگيكالىق باعىت بويىنشا ماگيستراتۋراعا ءتۇسۋ ءۇشىن 75 بال، بەيىندىك باعىت بويىنشا 50 بال جيناۋ قاجەت.
