قىزىلوردادا 100 جاساعان قوس قاريا العاشقىلاردىڭ ءبىرى بولىپ داۋىس بەردى

قىزىلوردا. قازاقپارات - قىزىلوردا وبلىسىندا عاسىر جاساعان قوس قاريا ق ر ءماجىلىس پەن ءماسليحات دەپۋتاتتارىن سايلاۋىندا العاشقى بولىپ داۋىس بەردى، دەپ حابارلايدى قازاقپارات ءتىلشىسى.

قىزىلوردا وبلىسى سىرداريا اۋدانىندا تۇراتىن 101 جاستاعى سوعىس جانە ەڭبەك ارداگەرى ياحيا تاسىروۆ تەرەڭوزەك كەنتىندەگى №155 سايلاۋ ۋچاسكەسىندە تاڭداۋ جاسادى.

«دۇرىس تاڭداۋ جاساۋ ەلدىڭ ەرتەڭىن ەڭسەلى ەتەدى. قاشاندا مۇنداي ساياسي شارادان شەت قالمايمىن. بۇگىن دە سول ۇردىستەن اجڭىلعان جوقپىن»، - دەدى ي. تاسىروۆ.

سونىمەن قاتار قازالى اۋدانىنا قاراستى ع. مۇراتبايەۆ اۋىلىنىڭ 100 جاستاعى تۇرعىنى شامشا ايماش قىزى №64-سايلاۋ ۋچاسكەسىندە تاڭداۋىن جاسادى. ساياسي شارا رەسمي تۇردە اشىلعاننان كەيىن ول كىسى العاشقى بولىپ داۋىس بەردى.

«ساياسي ناۋقانعا ءوز ۇلەسىمدى قوسسام دەگەن نيەتپەن ەرتەمەن كەلىپ، تاڭداۋ جاسادىم. بارلىق تۇرعىن بۇگىنگى شارادان قالىس قالماۋى ءتيىس. حالقىمىز امان بولسىن! وزگەرىستەردىڭ بارلىعى وڭىنان بولسىن»، - دەدى ش. ايماش قىزى.

قارت انا ءوز تاڭداۋىن جاساعاننان كەيىن اق باتاسىن بەرىپ، ساتتىلىك تىلەدى. سايلاۋ ۋچاسكەسىنىڭ ءتوراعاسى دارحان الدابەرگەنوۆ اجەگە قازاقى داستۇرگە ساي كامزول كيگىزىپ، يىعىنا اق جاۋلىقتى جاپتى.

كەيۋانا التى ۇل-قىز تاربيەلەپ وسىرگەن. بۇگىندە 15 نەمەرە، 28 شوبەرە، 8 شوپشەك ءسۇيىپ وتىر. ول كىسى بارلىق ساياسي ناۋقانعا بەلسەنە قاتىسىپ كەلەدى.

ەسكە سالساق، بۇگىن ەلىمىزدە قازاقستاندا ءماجىلىس پەن ءماسليحات دەپۋتاتتارىن سايلاۋ باستالدى.