الەۋمەتتىك جەلىدە جالعان اقپارات تاراتقان اتىراۋلىق 100 ساعات كوشە سىپىرادى
اتىراۋ وبلىستىق سوتىنىڭ قىلمىستىق ىستەر جونىندەگى سوت القاسىندا تەلەكوممۋنيكاتسيا جەلىلەرىن پايدالانىپ، قوعامدىق ءتارتىپتى بۇزۋ قاۋپىن تۋعىزاتىن كورىنەۋ جالعان اقپارات تاراتقان جەرگىلىكتى بەلسەندىگە قاتىستى قىلمىستىق ءىس قارالدى.
بۇل قىلمىستىق ءىس ق ر قىلمىستىق كودەكسىنىڭ 274-بابىنىڭ 2-بولىگىنىڭ 3-تارماعىمەن تەرگەلگەن.
«ءبىرىنشى ساتىداعى سوتتىڭ ۇكىمىمەن د. 2022 -جىلعى 3-شىلدەدە ءوز پاتەرىندە ا. س. اتىمەن تىركەلگەن Facebook الەۋمەتتىك قوسىمشاسىنىڭ كومەگىمەن ۇيالى تەلەفون ارقىلى قوعامدىق ءتارتىپتى بۇزۋ قاۋپىن تۋعىزاتىن كورىنەۋ جالعان، شىندىققا سايكەس كەلمەيتىن اقپاراتتى تاراتقان. ول قاراقالپاقستان رەسپۋبليكاسىنا ميتينگتەردى باسۋ ءۇشىن قازاقستان اسكەرلەرى جىبەرىلگەنىن، اسكەر جىبەرىلگەن جاعدايدا جاپپاي نارازىلىق ۇيىمداستىرۋعا شاقىرعان بەينەروليكتى جۇكتەگەن. سوت ۇكىمىمەن د. كىنالى دەپ تانىلىپ، وعان 100 ساعات مەرزىمگە ءماجبۇرلى ەڭبەككە تارتا وتىرىپ، 1 جىل مەرزىمگە باس بوستاندىعىن شەكتەۋ تۇرىندەگى جازا تاعايىندالعان ەدى»، - دەپ حابارلادى وبلىستىق سوتتىڭ باسپا ءسوز قىزمەتى.
ءىس اپەللياتسيادا سوت ۇكىمىنىڭ كۇشىن جويىپ، اقتاۋ ۇكىمىن شىعارۋدى سۇراعان سوتتالۋشىنىڭ جانە ونىڭ قورعاۋشىسىنىڭ اپەللياتسيالىق شاعىمدارى بويىنشا قارالدى.
«سوت ۇكىمىن وزگەرتۋگە نەمەسە ونىڭ كۇشىن جويۋعا نەگىز بولمادى. سول سەبەپتەن قىلمىستىق ىستەر جونىندەگى سوت القاسىنىڭ قاۋلىسىمەن ءبىرىنشى ساتىدا سوتتىڭ ۇكىمى وزگەرىسسىز، اپەللياتسيالىق شاعىم قاناعاتتاندىرىلمادى»، - دەپ ءمالىم ەتتى باسپا ءسوز قىزمەتىنەن.
ەسكە سالا كەتەلىك، بۇعان دەيىن اتىراۋدا 14 جاسار وقۋشى مەكتەپكە بومبا قويىلعانى تۋرالى جالعان حابار بەرگەنىن جازعان ەدىك.
