قوستاناي وبلىسىنداعى ءورت: زارداپ شەككەندەرگە 100 شارشى مەتردەن باسپانا سالىنادى
بۇل تۋرالى ق ر يندۋستريا جانە ينفراقۇرىلىمدىق دامۋ ۆيتسە-ءمينيسترى ەركەبۇلان داۋىلبايەۆ ايتتى، دەپ حابارلايدى قازاقپارات.
ءتىلسىز جالىننان ەڭ كوپ زارداپ شەككەن ەلدى مەكەننىڭ ءبىرى - امانقاراعاي اۋىلى. جالپى العاندا، قوستاناي وبلىسىنداعى ءورت 108 نىساندى شارپىدى. ونىڭ 91 ءى - تۇرعىن ءۇي. سونىڭ ىشىندە امانقاراعاي اۋىلىندا – 85، وزەرنوە اۋىلىندا 6 باسپانا زاقىمدالعان.
«تەحنيكالىق زەردەلەۋ قورىتىندىسى بويىنشا تۇرعىن ۇيلەر تولىقتاي جانىپ كەتكەندىكتەن قايتا قالپىنا كەلتىرۋگە جاتپايدى. قازىرگى كۇندە تۇرعىن ءۇي قۇرىلىسىن جۇرگىزۋ ءۇشىن اۋليەكول اۋىلىنان 2 گەكتار جەر تەلىمى ءبولىندى. ونداعى ءار 8 سوتىق جەرگە جالپى اۋماعى 100 شارشى مەتردى قۇرايتىن ءبىر قاباتتى باسپانالار سالىنادى. وسى ورايدا ايتا كەتەرلىگى، اۋليەكول اۋىلى اۋدان ورتالىعى بولعاندىقتان ەلدى مەكەندە ينفراقۇرىلىم تولىقتاي جۇرگىزىلگەن. اۋىلدا الەۋمەتتىك-تۇرمىستىق ماقساتتاعى نىسانداردىڭ بارلىعى بار»، - دەلىنگەن مينيسترلىك مالىمەتىندە.
ۆيتسە-مينيستر ەركەبۇلان داۋىلبايەۆتىڭ ايتۋىنشا، قۇرىلىس جۇمىستارىنا تەك جەرگىلىكتى وندىرۋشىلەردىڭ ءونىمى قولدانىلادى.
«جەدەل تۇردە جۇمىستى باستاۋ تۋرالى تاپسىرما قويىلىپ وتىر. يندۋستريا جانە ينفراقۇرىلىمدىق دامۋ مينيسترلىگى ەكى اي ىشىندە قۇرىلىس جۇمىستارىن تولىقتاي اياقتاۋدى ماقسات ەتەدى. بۇل ءۇشىن بارلىق ءتيىستى شارالار قابىلدانىپ جاتىر. اتالعان ماسەلە مينيسترلىك باسشىسىنىڭ تىكەلەي باقىلاۋىندا»، - دەدى ول.
«قازاق قۇرىلىس جانە ساۋلەت عىلىمي-زەرتتەۋ جانە جوبالاۋ ينستيتۋتى» ا ق مەن ق ر ي ي د م قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ «مەملەكەتتىك ساراپتاما» ر م ك وزدەرىنىڭ جەكە قايتارىمسىز قاراجاتى ەسەبىنەن ينجەنەرلىك جۇيەلەردىڭ جوباسىن دايارلاۋعا كىرىسىپ كەتكەن. مەملەكەتتىك ساراپتاما دا ينستيتۋتتاردىڭ قارجىسى ەسەبىنەن جۇرگىزىلەدى دەپ كۇتىلۋدە.
ايتا كەتەيىك، مەملەكەت باسشىسىنىڭ تاپسىرماسى بويىنشا توتەنشە جاعدايدىڭ سالدارىن جويۋ ماقساتىندا قاجەتتى قاراجات ءبولىندى. ق ر پرەمەر-ءمينيسترى وتكىزگەن وتىرىستا قوستاناي وبلىسىندا ورتتەن زارداپ شەككەن تۇرعىندار ءۇشىن جەدەل ارادا باسپانا سالۋ بويىنشا تاپسىرما بەرىلدى. قازىرگى كۇندە ق ر ي ي د م كولىك قاتىناسىن قالپىنا كەلتىرۋ بويىنشا جۇمىستار جۇرگىزىپ، بارلىق ينفراقۇرىلىمدىق نىسانداردىڭ ۇزدىكسىز جۇمىس ىستەۋىن قامتاماسىز ەتۋ بويىنشا ءتيىستى شارالاردى ىسكە اسىرۋدا.
