ەلوردادا جىل سوڭىنا دەيىن تاعى 100 جاڭا ەلەكتر اۆتوبۋسى جولعا شىعادى

قوزعالىس قاۋىپسىزدىگىن قامتاماسىز ەتۋ ءۇشىن كەيبىر كوشەلەردە جول جۇمىستارى ءجۇرىپ جاتىر. استانا اكىمدىگى وسىنىڭ ءبارىن ەسكەرە وتىرىپ، مارشرۋتتى الدىن الا جوسپارلاۋعا شاقىرادى، دەپ حابارلايدى قازاقپارات.

كولىك باسقارماسىنا جەلىگە بارىنشا كوبىرەك قوعامدىق كولىك، سۇرانىسقا يە مارشرۋتتارعا قوسىمشا اۆتوبۋستار شىعارۋ تاپسىرىلدى.

بيىل جىل سوڭىنا دەيىن تاعى 100 جاڭا ەلەكتر اۆتوبۋسىن ىسكە قوسۋ جوسپارلانىپ وتىر.

كوشەلەردە كولىك اعىنىن سەيىلتۋ ءۇشىن بيىل تامىز ايىندا ۇلى دالا كوپىرىندە قوزعالىس اشىلدى.

كوپىر ماڭگىلىك ەل داڭعىلىنداعى، ا. بايتۇرسىن ۇلى، ر. قوشقاربايەۆ، ج. ناجىمەدەنوۆ كوشەلەرىندەگى، Nova city اۋدانى مەن «مىڭجىلدىق» اللەياسىنداعى كولىك اعىنىن ءىشىنارا سەيىلتۋگە مۇمكىندىك بەرەدى، بۇعان قوسا جاڭا «نۇرلى جول» ۆوكزالى، تەلمان جانە پرومىشلەننىي ەلدى مەكەندەرى، مەترو گيپەرماركەتى اۋدانى، جۇمابايەۆ داڭعىلى، جۇرگەنوۆ كوشەسى جانە باسقا جولدار اراسىندا بايلانىستى ارتتىرادى.

سول سياقتى ا62 كوشەسىنىڭ (ا91 كوشەسىنەن نۇر- سۇلتان - قاراعاندى تراسساسىنا دەيىنگى ارالىق) قۇرىلىسى ءجۇرىپ جاتىر.

جوسپار بويىنشا بۇل ماڭايدا قوزعالىس بيىل كۇزدە اشىلادى.

بۇل كوشە قاراعاندى تراسساسى مەن «نۇرلى جول» تەمىرجول ۆوكزالى، سول سياقتى قالانىڭ سول جاق بولىگى اراسىندا كولىك قاتىناسىن قامتاماسىز ەتەدى.

كولىك قوزعالىسىنا ارنالعان تاعى ءبىر كوپىر كەلەسى جىلى اشىلادى. ول ەسىل وزەنى ارقىلى تاۋەلسىزدىك داڭعىلىن جالعايدى.