تۇركىستان وبلىسىندا «اڭساعان ءسابي» باعدارلاماسى اياسىندا 100 دەن استام نارەستە ومىرگە كەلدى
بۇل تۋرالى ق ر دەنساۋلىق ساقتاۋ ءمينيسترى اجار عينيات تۇركىستانعا كەلگەن ساپارىندا ايتتى، دەپ حابارلايدى قازاقپارات ءتىلشىسى.
دەنساۋلىق ساقتاۋدىڭ باسىم باعىتتارىنىڭ ءبىرى انا مەن بالانى قورعاۋ بولىپ قالا بەرەتىنىن اتاپ وتكەن مينيستر ەلىمىزدەگى پەريناتالدىق قىزمەت دەڭگەيىن كوتەرۋ مىندەتى قويىلىپ وتىرعاندىعىن جەتكىزدى.
«مەملەكەت باسشىسىنىڭ تاپسىرماسىن ىسكە اسىرۋ اياسىندا حالىقارالىق ستاندارتتارعا سايكەس كەلەتىن 8 پەرزەنتحانا، ونىڭ ىشىندە تۇركىستان وبلىسىندا - 2 پەرزەنتحانا سالۋ جوسپارلانۋدا»، - دەدى ا. عينيات.
سونداي-اق، ەلىمىزدىڭ باس دارىگەرى «اڭساعان ءسابي» باعدارلاماسى اياسىندا تۇركىستان وبلىسىندا 100 دەن استام نارەستە ومىرگە كەلگەندىگىن ايتىپ ءوتتى.
«2021-جىلدان باستاپ قازاقستان رەسپۋبليكاسى پرەزيدەنتىنىڭ تاپسىرماسى بويىنشا «اڭساعان ءسابي» ارنايى باعدارلاماسى ىسكە قوسىلدى.
وندا 2026-جىلعا دەيىن ە ك ۇ- عا جىل سايىن 7000 كۆوتا ءبولۋ قاراستىرىلعان. 2021-جىلى تۇركىستان وبلىسىندا 453 كۆوتا ءبولىندى. 62 ايەل جۇكتى بولىپ، 106 سى بالا تۋۋدىڭ باقىتىنا يە بولدى»، - دەدى مينيستر.
سونداي-اق، ا. عينيات دەنساۋلىق ساقتاۋ جۇيەسىن كادرلارمەن قامتاماسىز ەتۋ تۋرالى ايتتى.
ماسەلەن، 2021-جىلى ەلىمىزدىڭ وڭىرلەرىنە مەديتسينالىق جوعارى وقۋ ورىندارىنىڭ 3050 تۇلەگى ءبولىندى.
ونىڭ ىشىندە تۇركىستان وبلىسىنا - 180 تۇلەك جىبەرىلگەن. ال، بيىل 170 تۇلەك جىبەرۋ جوسپارلانۋدا. 2025-جىلعا قاراي رەسپۋبليكالىق بيۋجەت ەسەبىنەن گرانتتار سانى 2000 عا دەيىن جانە جەرگىلىكتى بيۋجەت قاراجاتى ەسەبىنەن 1500 دەن استام گرانت ۇلعايتىلاتىن بولادى.
