استانادا 100 ۇلتتىڭ مۋزىكانتى كونسەرت قويادى
بۇل جونىندە نۇر-سۇلتان قالاسى مادەنيەت باسقارماسىنىڭ باسشىسى سانات شاپاشوۆ قالالىق ءماسليحات وتىرىسىندا ءمالىم ەتتى، دەپ حابارلايدى قازاقپارات ءتىلشىسى.
«گيننەستىڭ رەكوردتار كىتابىمەن كەلىسسوز جۇرگىزدىك. الەمدىك ءدىني كوشباسشىلاردىڭ سەزىندە دۇنيە جۇزىندە العاش رەت 100 ءتۇرلى ۇلتتىڭ مۋزىكانتتارىنىڭ باسىن قوسقان انسامبل قۇرماقپىز. گيننەستىڭ رەكوردتار كىتابىنا ۇمىتكەر رەتىندە تىركەلىپ تە قويدىق»، - دەدى سامات شاپاشوۆ.
سونداي-اق، ول قالاداعى مەملەكەتتىك اكادەميالىق فيلارمونيانىڭ ارتىستەرى عيماراتقا سىيماي جاتقانىن ەسكە سالدى.
«مەملەكەتتىك اكادەميالىق فيلارمونياعا 7 ايلىق ارەندا شىعىندارىنا 220 ميلليون تەڭگە قاجەت. ادامدار سىيماي جاتقاندىقتان 7 ايعا قوسالقى عيمارات جالداۋعا ءماجبۇرمىز. سونداي-اق، فيلارمونيا ارتىستەرىنىڭ رەپەرتۋارىن تانىمال پلاتفورمالارعا شىعارعىمىز كەلەدى. ادامدارعا Apple پلاتفورماسىندا ۇلتتىق وركەسترلىك مۋزىكانى ەستۋ مۇمكىندىگىن بەرمەكپىز. «شەكسىز قالا» دەيتىن جاقسى جوبامىز بار. سونىڭ اياسىندا 1- ماۋسىمنان باستاپ تامىزدىڭ سوڭىنا دەيىن ارتىستەردىڭ ۇركەر، كوكتال، ءوندىرىس ەلدى ىقشام اۋداندارىن ارالاپ، ويىن-ساۋىق باعدارلاماسىن، دارىستەر مەن شەبەرلىك ساعاتتارىن وتكىزۋى جوسپارلانعان. مەديا تۇلعالارمەن كەزدەسۋلەر دە وتكىزىلەدى. ياعني، جاز بويى شەتكەرى اۋدانداردا تۇراتىن بالالار وسىنداي جولمەن قوسىمشا ءبىلىم الادى»، - دەدى سانات شاپاشوۆ.
ءماسليحات وتىرىسىندا قالالىق تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ شاھاردىڭ جاڭا كوشەلەرىنە ولكەدەگى كونە تاريحي اتاۋلاردى بەرۋ جوسپارلانىپ وتىرعانىن ايتتى.
