قازاقستانداعى 100-دەن استام بازاردا باعا بويىنشا تەكسەرۋ ءجۇرىپ جاتىر

نۇر-سۇلتان. قازاقپارات - ەلدەگى 127 كوتەرمە جانە بولشەك ساۋدا بازارىندا باعانى باقىلاۋعا ارنالعان تەكسەرۋلەر ءجۇرىپ جاتىر، دەپ حابارلايدى قازاقپارات ءتىلشىسى.

بۇل جونىندە ءماجىلىستىڭ جالپى وتىرىسىنان كەيىن ب ا ق وكىلدەرىنە بەرگەن سۇحباتىندا ق ر پرەمەر- ءمينيسترىنىڭ ورىنباسارى - ساۋدا جانە ينتەگراتسيا ءمينيسترى باقىت سۇلتانوۆ ايتتى. «ينفلياتسياعا قارسى شارالار قابىلدادىق. ونىڭ ءبىرى باعانى تۇراقتى ۇستاپ تۇرۋعا باعىتتالعان. مۇنىڭ اياسىندا 67 شارا كوزدەلگەن. جۇيەلى شارالار ونىمدەردىڭ تاپشىلىعىن بولدىرماۋدى، ساپالى بولۋى جانە باعا بويىنشا قولجەتىمدى بولۋىن قامتيدى. بۇل باعىتتا اۋىل شارۋاشىلىعى مينيسترلىگىنىڭ باعدارلاماسى قاتار جۇمىس ىستەپ جاتىر. ول باعدارلاما قاجەتتى ونىمدەرمەن ورتا مەرزىمدە قامتاماسىز ەتۋگە باعىتتالعان. ازىق- تۇلىك ونىمدەرىمەن 100 پايىز قامتاماسىز ەتىپ، 6 يمپورتتىق تاۋاردىڭ باعاسىن ءتۇسىرۋ جانە يمپورتقا تاۋەلدىلىكتى بارىنشا ازايتۋ جوسپارلانىپ وتىر»، - دەگەن مينيستر «ەگىستەن سورەگە دەيىن» اتتى جوبا دا ماسەلەگە ارنالعانىن ەسكە سالدى.

ايتۋىنشا، ازىق- تۇلىك باعاسىن 15 پايىزدىق مەجەدەن وسىرمەي ۇستاپ تۇرۋ ءۇشىن، ءتىپتى اۋدان ورتالىقتارىندا دا تەكسەرۋ باستالىپ كەتكەن.

«وڭىرلەردە ارنايى شۇعىل شارالار ءجۇرىپ جاتىر. كوتەرمە بازارلاردى تەكسەرۋگە بەرىلگەن موراتوريدىڭ الىنىپ تاستالۋىنا بايلانىستى 127 كوتەرمە جانە بولشەك بازاردا ارنايى تەكسەرۋلەر جۇرگىزىلىپ جاتىر. ودان بولەك باعانى ەل اراسىنداعى دۇرلىگۋدى پايدالانا وتىرىپ كوتەرۋ ماسەلەسى بار. بۇل ماسەلەنى مونيتورينگ توپتاردىڭ كومەگىمەن شەشىپ جاتىرمىز. بۇگىندە الدىنا الا ارالاپ، زاڭمەن بەكىتىلگەن 15 پايىزدىق مەجەدەن ارتىق باعانى كوتەرۋگە بولمايتىنى تۋرالى ەسكەرتۋ جاسالدى. سونىڭ اياسىندا وبلىس ورتالىقتارىنداعى اۋلا دۇكەندەرىنىڭ 85 پايىزىن قامتىدىق. وتكەن اپتادان بەرى مۇنداي تەكسەرۋلەر اۋدان ورتالىقتارىندا دا باستالدى. مۇنىڭ ءبارىنىڭ ءوز ناتيجەسى بولادى دەپ ويلايمىن. ونىڭ ۇستىنە اينالىم قاراجاتىن ارتتىرۋ ءۇشىن قوسىمشا 100 ميلليارد تەڭگە ءبولىندى. تۇراقتاندىرۋ قورلارىمەن دە جۇىس ىستەپ جاتىرمىز. وسىنداي كەشەندى شارالاردىڭ ارقاسىندا جىلدىق ەسەپتە باعا ءوسىمىن 10 پايىز كولەمىندە ۇستاپ تۇرۋ مۇمكىن بولىپ وتىر»، - دەدى باقىت سۇلتانوۆ.

ايتا كەتەيىك، ءماجىلىستىڭ جالپى وتىرىسىندا ق ر دەنساۋلىق ساقتاۋ ءمينيسترى اجار عينيات ۋكراينادان ءدارى اكەلۋ كەلىسىمشارتتارىنىڭ كۇشى جويىلاتىنىن ءمالىم ەتتى.