ەلوردادا قاۋىپسىزدىگى تومەن كولونيادا جازاسىن وتەۋشىلەر 100 پايىز جۇمىسپەن قامتىلعان
بۇل تۋرالى اتالعان مەكەمەنىڭ سوتتالعانداردى ەڭبەكپەن قامتۋدى ۇيىمداستىرۋ ءبولىمىنىڭ باسشىسى، ادىلەت مايورى ايگۇل داۋىتوۆا ءمالىم ەتتى، دەپ حابارلايدى قازاقپارات ءتىلشىسى.
«ق ر قىلمىستىق- اتقارۋ كودەكسىنىڭ 119-بابىنا ساي سوتتالعانداردى ەڭبەكپەن قامتۋ ماسەلەسى قاراستىرىلعان. وعان سايكەس ءبىز ولاردى جۇمىسپەن قامتيمىز. سوتتالعاندارعا جۇمىستى مەملەكەتتىك جانە جەكە مەكەمەلەر ۇسىنادى. ياعني كەيبىرىنىڭ جۇمىسى قالا ىشىندە بولسا، كەيبىرى ونەركاسىپتىك ايماقتا ەڭبەكتەنىپ جاتىر. قازىرگى ۋاقىتتا ءبىزدىڭ مەكەمەدە 297 سوتتالعان ازامات جازاسىن وتەپ جاتىر جانە وسى اتالعان بارلىق ازاماتتار جۇمىسپەن قامتىلعان. ولاردىڭ اراسىندا اۋلا تازالاۋشى، اسپاز، اۆتومەحانيك، تىگىنشى، ەدەن جۋۋشى، باعبان سەكىلدى ماماندار بار. سونداي-اق، ونەركاسىپ ايماعىندا جول ءجۇرۋ ەرەجەسى بەلگىلەرىن جاساپ شىعاراتىن ج ش س جۇمىس ىستەپ تۇر. ودان بولەك، ارنايى كيىمدەر شىعاراتىن تىگىن سەحى مەن تەحنيكالىق بايقاۋ ستانتسياسى (س ت و) جۇمىس ىستەيدى»، - دەدى ايگۇل داۋىتوۆا.
ونىڭ ايتۋىنشا، سوتتالعان ازاماتتاردىڭ جۇمىسقا ىنتاسى جوعارى.
«وتباسىلى جاندار جۇمىس ىستەپ ءۇي ىشىنە كومەكتەسكىسى كەلەدى. كەيبىرىنىڭ نەسيەسى بار، ونى تولەۋ كەرەك. جالپى ەڭبەكتەنەم دەگەن جانعا بىزدە جۇمىس تابىلادى. سول سياقتى ءبىرقاتار جۇمىس ورىندارى قالانىڭ ىشىندە ورنالاسقان. كۇندەلىكتى تاڭەرتەڭ جۇمىس بەرۋشى الىپ كەتىپ، كەشكە الىپ كەلەدى. ارينە، ءوز تاراپىمىزدان جۇمىسشىلاردى قاداعالاپ، تەكسەرىپ تۇرامىز. سونداي-اق، بىزگە كەلىپ جۇمىسشى ىزدەپ جاتقان مەكەمەلەردىڭ قاتارى كوپ. دەنى قۇرىلىس جانە قۇرىلىس كومپانيالارى»، - دەيدى ول.
ەڭبەكپەن قامتۋ ءبولىمى باسشىسىنىڭ ايتۋىنشا، اتالعان كولونيادا نەگىزىنەن جول-كولىك وقيعاسىنا كىنالى جانە ۇرلىق جاساعاندار جازاسىن وتەپ جاتىر. بۇعان دەيىن اتالعان مەكەمەدە جازاسىن وتەۋشىلەر جىلىجايدا قيار ءوسىرىپ، اپتا سايىن 100 كەلى ءونىم الىپ وتىرعانى تۋرالى حابارلاعان ەدىك.