كانادادا ءبىر ايعا جۋىق شەرۋگە شىققاندار كۇشپەن تاراتىلىپ، 100 ادام ۇستالدى
كانادالىق پوليتسەيلەر «تازارتۋ» وپەراتسياسى جۇما كۇنى تاڭەرتەڭ باستالدى. بۇعان دەيىن كانادا ۇكىمەتى نارازىلىققا شىققانداردى كۇشپەن تاراتۋعا مۇمكىندىك بەرەتىن توتەنشە جاعدايلار تۋرالى زاڭ قابىلدادى.
وپەراتسيا كەزىندە 100 ادام قاماۋعا الىندى. قارسىلىق كورسەتكەن كەيبىر نارازىلاردى پوليتسەيلەر قولىن بايلاپ، اكەتۋگە ءماجبۇر بولعان. سونىمەن قاتار كانادانىڭ ونتاريو پروۆينتسياسىنىڭ جوعارعى سوتى ءتۇرلى ەلدەردەن نارازىلاردى قولداۋ ءۇشىن جىبەرگەن ميلليونداعان دوللاردى، سونىڭ ىشىندە كريپتوۆاليۋتا جانە ءتۇرلى بانك شوتتارىن بۇعاتتاۋ تۋرالى شەشىم قابىلداندى.
شوتتاردى بۇعاتتاۋ وتتاۆا تۇرعىندارى مەن بيزنەسمەندەردىڭ تالاپ- ارىزى نەگىزىندە قابىلدانعان. ادۆوكات پول چامپدىڭ سوزىنە قاراعاندا، مۇنداي شارا كانادالىق سوت ءىسى تاريحىنداعى العاشقى شەشىم بولعان.
ەستەرىڭىزگە سالا كەتەيىك، قاڭتار ايىنىڭ سوڭىندا كانادالىق جۇك كولىگىن جۇرگىزۋشىلەر ا ق ش- قا قاتىناۋ ءۇشىن مىندەتتى ۆاكسيناتسيا پاسپورتتارىن ەنگىزۋگە نارازىلىق بىلدىرگەن بولاتىن. ارتىنشا بۇل اكسيا كوروناۆيرۋسقا قارسى شارالار مەن دجاستين تريۋدو ۇكىمەتىنىڭ ساياساتىنا قارسى جالپى نارازىلىققا اينالدى. كەيىن قارسىلىق شەرۋى ەۋروپا ەلدەرىندە جالعاستى.
اۆتور: سماعۇلوۆا ەركەجان
