الماتىدا 100 جاستاعى كەيۋانا كوروناۆيرۋستان جازىلىپ شىقتى
دامەش قاراتايەۆا الماتى قالاسى ي. جەكەنوۆ اتىنداعى كليننيكالىق جۇقپالى اۋرۋلار اۋرۋحاناسىنا 5- اقپان كۇنى جوتەل جانە السىزدىكپەن اۋىر حالدە ءتۇستى.
دارىگەرلەردىڭ ايتۋىنشا، ناۋقاس بىردەن ينتەنسيۆتى تەراپيا بولىمشەسىندە ەم الىپ، ديناميكاسى جاقسارعان.
«ناۋقاس كوروناۆيرۋس ينفەكتسياسى دياگنوزىمەن، وكپەسىنىڭ %25 زاقىمدانۋىمەن ءتۇستى. اۋرۋدى جەڭۋدەگى باستى نارسە - اجەيدىڭ ومىرگە دەگەن قۇشتارلىعى»، - دەيدى ي. جەكەنوۆ اتىنداعى كلينيكالىق جۇقپالى اۋرۋلار اۋرۋحاناسىنىڭ 1- ساناتتى دارىگەرى دانيا ناسىربەكوۆا.
ءوز كەزەگىندە عاسىر جاساعان اجەي مەديتسينا قىزمەتكەرلەرىنە ريزاشىلىعىن ءبىلدىردى.
«مەنى ەمدەپ، قولداۋ ءبىلدىرىپ جاتقان اق حالاتتى ابزال جاندارعا راحمەتىمدى ايتامىن، اينالايىندار، ءومىر جاستارىڭ ۇزاق بولسىن. مەنىڭ جاسىمدى بەرسىن. ەلىمىز تىنىش بولىپ، كوركەيە بەرسىن»، - دەپ باتاسىن بەردى ول.
ايتا كەتەيىك، دامەش اجە ءوزىنىڭ 100 گە كەلگەن تۋعان كۇنىندە اۋرۋحانادان شىقتى.
«قوس قۋانىشى قاتار كەلگەن كەيۋانانى اۋرۋحانا ماماندارى گۇل شوعى مەن سىيلىق بەرىپ، ۇيىنە شىعاردى. ال كەيۋانانىڭ جاقىندارى اۋرۋحانا اكىمشىلىگىنە العىسىن ايتتى»، - دەپ قوستى الماتى قالالىق قوعامدىق دەنساۋلىق باسقارماسىنىڭ باسپا ءسوز قىزمەتى.
