ەلدىمەكەندەر قاشان اۋىز سۋمەن 100 پايىز قامتىلادى

بۇل تۋرالى ق ر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆ ايتىپ بەردى، دەپ حابارلايدى قازاقپارات ءتىلشىسى.

«قازىرگى ۋاقىتتا رەسپۋبليكا بويىنشا جالپى ۇزىندىعى 15,5 مىڭ شاقىرىم 76 توپتىق سۋ قۇبىرلارى بار، ونىڭ ىشىندە 13,4 مىڭ شاقىرىم بولاتىن 39 توپتىق سۋ قۇبىرى رەسپۋبليكالىق مەنشىكتە. ولار 1,2 ميلليون ادام مەكەندەيتىن 631 اۋىلدى اۋىز سۋمەن قامتاماسىز ەتۋدە. وتكەن جىلى الماتى، باتىس قازاقستان جانە قىزىلوردا وبلىستارىندا 3 توپتىق سۋ قۇبىرى پايدالانۋعا بەرىلدى»، - دەدى س. برەكەشەۆ ۇكىمەت وتىرىسىندا.

ناتيجەسىندە 343 كيلومەتر جەلى سالىنىپ، 124,5 مىڭ ادام تۇراتىن 13 اۋىل مەن 1 قالادا سۋمەن جابدىقتاۋ قامتاماسىز ەتىلدى جانە جاقساردى.

«بيىل توپتىق سۋ قۇبىرلارىن سالۋ جانە قايتا جاڭارتۋ 16 نىساندا ءجۇرىپ جاتىر، ونىڭ ىشىندە جىل سوڭىنا دەيىن 8 نىسان اياقتالادى. بۇگىنگى كۇنى 2 نىسان پايدالانۋعا بەرىلدى. بۇل پرەسنوۆ توپتىق سۋ قۇبىرىنىڭ ەكىنشى كەزەگى جانە ەسكۋلينسك ۋچاسكەسىن كوشىرۋ جۇمىستارى. بۇل جۇمىستار ناتيجەسىندە 5,8 مىڭ ادامى بار 5 اۋىل ساپالى اۋىز سۋعا قول جەتكىزە الادى جانە اقمولا، اقتوبە، قاراعاندى جانە قىزىلوردا وبلىستارىندا 203 مىڭ ادام تۇراتىن 51 اۋىل مەن 3 قالادا سۋمەن جابدىقتاۋ جاقسارتىلادى»، - دەدى مينيستر.

قالعان 8 نىسان بويىنشا 2022-2023 -جىلدارى پايدالانۋعا بەرۋ جوسپارلانۋدا. «قۋاتتى وڭىرلەر - ەل دامۋىنىڭ درايۆەرى» ۇلتتىق جوباسى اياسىندا 5 جىلدا جالپى قۇنى 36 ميلليارد تەڭگە بولاتىن 11 توپتىق سۋ قۇبىرلارىن سالۋ جانە قايتا جاڭارتۋ جوسپارلانۋدا. ناتيجەسىندە 23,3 مىڭ ادامى بار 63 اۋىل سۋمەن قامتىلادى جانە 43,4 مىڭ ادامى بار 37 اۋىلدا سۋمەن جابدىقتاۋ جاقسارتىلادى. جالپى 5 جىلدا شامامەن مىڭ جارىم شاقىرىم توپتىق سۋ قۇبىرلارى سالىنىپ، ەلدى مەكەندەردى سۋمەن قامتۋ كورسەتكىشىن 100 پايىزعا جەتكىزۋ جوسپارلانۋدا»، - دەدى س. برەكەشەۆ.

اۆتور: ايجان سەرىكجان قىزى