وتباسى كۇنى: ەلىمىزدە جىل سايىن 100 مىڭعا جۋىق جاس جۇباي نەكە قيادى
مەملەكەت بىزدىڭ قوعامدا نەگىزگى وتباسىلىق قۇندىلىقتاردى نىعايتۋدىڭ ماڭىزدىلىعىنا ەرەكشە نازار اۋدارىپ وتىر. قازاقستاندا وتباسى كۇنى ق ر تۇڭعىش پرەزيدەنتى - ەلباسىنىڭ جارلىعىمەن 2013 -جىلدان باستاپ قىركۇيەك ايىنىڭ ەكىنشى جەكسەنبىسىندە اتالىپ وتەدى. بيىل بۇل داتا 12- قىركۇيەككە سايكەس كەلدى.
بيىل ايتۋلى كۇن قارساڭىندا ەلورداداعى «استانا- بايتەرەك» مونۋمەنتىندە جاس جۇبايلار سالتاناتتى تۇردە نەكەلەستى. شاراعا ق ر اقپارات جانە قوعامدىق دامۋ ۆيتسە- ءمينيسترى اسقار ۋماروۆ قاتىستى.
«جاقىندا عانا مەملەكەت باسشىسى قاسىم- جومارت توقايەۆ قازاقستان حالقىنا جولداۋىندا وتباسىلىق جانە گەندەرلىك ساياسات كونتسەپسياسىنا ەلەۋلى وزگەرىستەر ەنگىزۋ قاجەتتىگىن اتاپ ءوتتى. جىل سايىن قازاقستاندا 100 مىڭعا جۋىق جاس جۇبايلار نەكە قيادى. بۇگىنگى وسى سالتاناتتى شارانىڭ «بايتەرەك» مونۋمەنتىندە ءوتۋى - سىزدەردەي جاس وتباسىلاردىڭ ءوسىپ كەلە جاتقان اعاشتاي تاريحي تامىرىن ساقتاپ، مىقتى تىرەگى بار، بولاشاققا ۇمتىلىسى بار مەملەكەتكە اينالاتىنىن بىلدىرەدى»، - دەگەن ەدى اسقار ۋماروۆ.
ەلىمىزدە وتباسى قۇندىلىعىن ساقتاپ، دارىپتەۋ ماقساتىندا جىل سايىن اۋقىمدى شارالار قولعا الىنىپ جاتىر. سونىڭ ءبىرى «مەرەيلى وتباسى» - ۇلتتىق بايقاۋى. اتالعان بايقاۋ ەلباسىنىڭ باستاماسىمەن 2013 -جىلى قۇرىلعان بولاتىن. ماقساتى - وتباسى ينستيتۋتىن، وتباسىلىق قۇندىلىقتاردى نىعايتۋ، بالا تاربيەسىندەگى اتا- انالاردىڭ جاۋاپكەرشىلىگىن ارتتىرۋ، قازاقستاندىق وتباسىنىڭ جاعىمدى يميدجىن ناسيحاتتاۋ.
جىل سايىن وتەتىن بايقاۋدا رەسپۋبليكا بويىنشا 17 ۇزدىك وتباسى انىقتالادى. بيىل كونكۋرستىق كوميسسياعا بارلىعى 2768 ءوتىنىم كەلىپ ءتۇسىپتى. وسى تۇستا ايتا كەتسەك، بيىل وتكەن «مەرەيلى وتباسى» ۇلتتىق بايقاۋىنىڭ كونسەرتى بۇگىن ساعات 14:30-دا «حابار» تەلەارناسىنان كورسەتىلەدى.