تۇركىستاندىقتار ماڭعىستاۋ وبلىسىنا 100 ۆاگونعا جۋىق جەم- ءشوپ جونەلتتى
بۇگىنگى تاڭدا وبلىس اكىمدىگى ەرىكتى جاستاردىڭ، كاسىپكەرلەردىڭ، جاناشىر تۇرعىنداردىڭ ۇيىمداستىرۋىمەن مال ازىعى تاپشىلىعى ورىن العان اۋماقتارعا وسىلايشا كومەك قولىن سوزۋدا، دەپ حابارلايدى قازاقپارات ءتىلشىسى.
اتاپ ايتقاندا ارىس قالاسىنان - 17 ۆاگون، سارىاعاش قالاسىنىڭ تەمىرجول ستانتسياسىنان - 51 ۆاگون، شىمكەنت قالاسىنان - 18 ۆاگون، بادام اۋىلدىق وكرۋگىنەن - 4 ۆاگون، وتىرار اۋدانىنان - 5 ۆاگون ءشوپ تيەلگەن. وبلىستىق اۋىل شارۋاشىلىعى باسقارماسىنىڭ مالىمەتىنشە، بيىلعى قۋاڭشىلىق باتىس وڭىرلەرىمەن قاتار، تۇركىستان وبلىسىنىڭ كەلەس، سارىاعاش اۋداندارىنىڭ جىل سايىن تابيعي ءشوپ وراتىن القاپتارىنا دا اسەر ەتىپ، تابيعي ءشوپ بىتىك شىقپاعان. الداعى قىس ايلارىندا مال ازىعىنىڭ تاپشىلىعىن الدىن الۋ ماقساتىندا وبلىستاعى ورمان قورىنىڭ جەرلەرىنەن تابيعي شوپتەردى ورىپ الۋ ۇيىمداستىرىلۋدا، سونىمەن قاتار كەلەس، سارىاعاش، جەتىساي، ماقتاارال اۋداندارى شاردارا، وتىرار اۋداندارىنىڭ جايىلىمدارىن پايدالانۋ تۋرالى مەموراندۋم جاسالعان.
وبلىستىڭ اگروقۇرىلىمدارىنا ورمان قورى جەرىنەن جايىلىمدىق جانە شابىندىق جەرلەر ۇسىنىلىپ، بيىلعى جىلدىڭ 6-ايىندا 545 اگروقۇرىلىمعا 563 مىڭ گا جايىلىم جەر، ءشوپ شابۋعا 23 اگروقۇرىلىمعا 1,5 مىڭ گا شابىندىق جەر بەرىلدى. وسى ورايدا، وبلىستىڭ مال ازىعى جاعدايىندا تالداۋ جاساپ، جاعدايدىڭ تۇراقتىلىعىنا كوز جەتكىزىلگەن.
بيىل وڭىردەگى مال باسىنا قاجەتتى 4 ميلليون تونناعا جۋىق مال ازىعىن تولىقتاي دايىنداۋعا مۇمكىندىكتەر بار. ونىڭ ىشىندە 2,7 ميلليون توننا جوڭىشقا، 134,6 مىڭ توننا سۇرلەم، 71 مىڭ توننا پىشەندەمە جانە 945 مىڭ توننا تابيعي ءشوپ جينالادى. بۇگىنگى كۇنگە 3,2 ميلليون توننا مال ازىعى جينالعان. ايماقتا مال شارۋاشىلىعى سالاسى تۇراقتى دامۋدا. سوڭعى ەكى جىلدىڭ وزىندە مال باسى مەن ودان الىنعان ءونىم كولەمى %10-15 ارتقان.