موڭعوليانىڭ باستى اقپارات اگەنتتىگىنە 100 جىل

بۇگىندە ەلدەگى بىرنەشە ب ا ق- تىڭ باسىن قوسىپ وتىرعان اگەنتتىك 1921-جىلدىڭ 19- شىلدەسىندە مونتا - موڭعول تەلەگراف اگەنتتىگى رەتىندە قۇرىلعان بولاتىن.

اگەنتتىكتىڭ 5 تىلدە حابار تاراتاتىن www.montsame.mn سايتىنان بولەك، اعىلشىن، جاپون، قىتاي جانە ورىس تىلدەرىندە، سونداي-اق، كونە مونعول جازۋىمەن شىعاتىن اپتالىق گازەتتەرى بار.

ال Mongolia Today جۋرنالى توقسان سايىن اعىلشىن تىلىندە اقپارات تاراتادى. ەلدىڭ 21 ايماعىندا اگەنتتىكتىڭ بولىمشەلەرى جۇمىس ىستەيدى. سونداي-اق، ماسكەۋ مەن بەيجىڭدە دە مەنشىكتى تىلشىلەر ۇستايدى.

قازاقستاندىق وقىرماندارعا «مونتسامە» اگەنتتىگى «قازاقپارات» حالىقارالىق اقپارات اگەنتتىگىنىڭ سەرىكتەسى رەتىندە تانىس.

قازاقستاندىق اگەنتتىكتىڭ بىلتىر عانا وتكەن 100 جىلدىق تويىنا مونتسامە اگەنتتىگى دە بەلسەنە اتسالىسقان بولاتىن.

تاريحى مەن مادەنيەتى جاقىن، ىرگەلەس ەكى ەلدىڭ نەگىزگى جاڭالىقتارىن ەكى ەلدىڭ باستى اقپارات اگەنتتىكتەرى ءوزارا ىنتىماقتاستىقتىڭ ارقاسىندا جۇرتقا ۋاقتىلى جەتكىزىپ كەلەدى.

مونتسامە «قازاقپارات» حالىقارالىق اگەنتتىگىنەن بولەك ازيا-تىنىق مۇحيتى ايماعىنىڭ OANA اقپارات اگەنتتىگىمەن، رەسەيدىڭ تاسس، ر ي ا نوۆوستي اگەنتتىكتەرىمەن، بريتاندىق Reuters اگەنتتىگىمەن، قىتايدىڭ شينحۋا اگەنتتىگىمەن، وڭتۇستىك كورەيانىڭ YONHAP اگەنتتىگىمەن، تۇركيانىڭ Anadolu اگەنتتىگىمەن ۇنەمى اقپارات الماسىپ وتىرادى.