ۆاكسينا ۆيرۋستان 100 پايىز قورعامايدى - دارىگەر
نۇر- سۇلتان. قازاقپارات - ەلوردالىق №10-ەمحانانىڭ الدىن الۋ قىزمەتىنىڭ باسشىسى دانيار قابىكەنوۆ ۆاكسينا - پاندەميامەن كۇرەستەگى جالعىز قارۋ ەكەنىن ايتتى، دەپ حابارلايدى قازاقپارات اكىمدىكتىڭ رەسمي سايتىنا سىلتەمە جاساپ.
قازىر الەمدە حالىقتى ۆاكسيناتسيالاۋ جۇمىسى قارقىندى جۇرگىزىلىپ جاتىر. كەيبىر ەلدەردە يممۋنداۋ جۇيەسى ءتىپتى مىندەتتەلدى. ۆاكسينا ونداعان جىلدار بويى ادام ءومىرىن قاۋىپتى اۋرۋلاردان امان ساقتاپ كەلە جاتقانمەن ونىڭ تيىمدىلىگىنە كۇمان كەلتىرەتىندەر بار. №10-قالالىق ەمحانانىڭ الدىن الۋ قىزمەتىنىڭ باسشىسى دانيار قابىكەنوۆ ۆاكسينا پاندەميامەن كۇرەستەگى جالعىز قارۋ بولىپ سانالاتىنىن ايتا كەلە ونىڭ قانداي پرينتسيپ بويىنشا جۇمىس ىستەيتىنىن ءتۇسىندىرىپ بەردى. دانيار قابىكەنوۆتىڭ ايتۋىنشا ۆاكسينا كەز كەلگەن ۆيرۋستان %100 قورعامايدى. ءبىراق اعزانى سول ۆيرۋسپەن كۇرەسۋگە دايىندايدى.
«ۆاكسينانىڭ قۇرامىنا اۋرۋدى تۋدىراتىن بەلسەندى ەمەس ميكروورگانيزمدەر كىرەدى. وسىنىڭ ارقاسىندا يمۋندى جۇيە اعزاعا ەنگەن قاۋىپتى سەزىپ، انتيدەنە بولەدى. بۇل قاۋىپتى ۆيرۋسپەن كۇرەسۋگە مۇمكىندىك بەرەدى. ۆاكسينانىڭ ءوزى اۋرۋ قوزدىرعىش بولا المايدى. دەگەنمەن ۆاكسيناتسيانىڭ كەيبىر جاعدايلارىندا دەنە قىزۋى كوتەرىلۋى، السىرەۋى، ينە سالعان جەرى ءىسۋى مۇمكىن. ال ەڭ باستىسى - ادام ۆاكسينانىڭ ارقاسىندا اۋرۋعا قارسى يممۋنيتەت الادى. مىنە، ءدال وسى سەبەپتى ۆاكسينا ءتۇرلى اۋرۋلارمەن كۇرەسۋدىڭ ءتيىمدى ءادىسى بولىپ سانالادى. ول ۆيرۋستىڭ ادام ازعاسىندا وسۋىنە جول بەرمەيدى»، - دەيدى ول.
ادام يممۋنداۋدان تولىق وتكەنمەن ۆيرۋس جۇقتىرۋى مۇمكىن. ءبىراق ۆاكسينا العان پاتسيەنت ينفەكسيا جۇقتىرعان جاعدايدا ەكپە الماعاندارمەن سالىستىرعاندا اۋرۋدى جەڭىل وتكىزەدى. وعان دالەل - تۇماۋعا قارسى ۆاكسينا. ۆاكسيناتسيادان كەيىن ادام تۇماۋمەن اۋىرعان جاعدايدا ەشقانداي اسقىنۋسىز، جىلدام ەمدەلەدى.
