100 تەڭگە ءۇشىن توبەلەس: الەۋمەتتىك جەلىدە بازارداعى جانجالدىڭ ۆيدەوسى تارادى

الماتى. قازاقپارات - الماتى ماڭىندا ورنالاسقان «التىن وردا» بازارىندا تۇراققا اقشا جينايتىن جىگىت پەن جۇرگىزۋشى توبەلەستى.

جانجالدىڭ ۆيدەوسى الەۋمەتتىك جەلىدە تارادى، دەپ حابارلايدى قازاقپارات ءتىلشىسى.

«ۆيدەو اۆتورىنىڭ ايتۋىنشا، 30 -ناۋرىز كۇنى تاڭعى ساعات 9:10-دا «التىن وردا» بازارىنا كەلگەن كەزدە ولاردان كولىك تۇراقشىسىنا ۇقسايتىن ادام تۇراق ءۇشىن 100 تەڭگە سۇراعان. ءبىراق جۇرگىزۋشى قولما- قول اقشا بولماعاندىقتان Kaspi قوسىمشاسىنا اۋدارعىسى كەلەتىنىن ايتقان. تۇراقشى باس تارتىپ، كولىكتىڭ يەسىن قۋىپ شىعۋعا تىرىسقان كورىنەدى. سالدارىنان توبەلەس باستالعان» دەيدى ۆيدەوجازباداعى ادام.

الماتى وبلىستىق پوليتسيا دەپارتامەنتىنىڭ باسپا ءسوز قىزمەتى ءمالىم ەتكەندەي، وقيعا بۇگىن تاڭەرتەڭ، ياعني 30 -ناۋرىزدا «التىن وردا» بازارىندا ساعات 09:10 شاماسىندا بولعان.

«اتالعان دەرەك الەۋمەتتىك جەلىلەرگە مونيتورينگ جۇرگىزۋ بارىسىندا انىقتالدى. وقيعا ورنىنا قاراساي اۋداندىق پ ب جەدەل تەرگەۋ توبى شىقتى. دەرەك سوتقا دەيىنگى تەرگەۋدىڭ ءبىرىڭعاي تىزىلىمىنە تىركەلىپ، ق ر ق ك 293-بابى 2-بولىگىنىڭ 1-تارماعى بويىنشا قىلمىستىق ءىس قوزعالدى. قازىرگى ۋاقىتتا بەينەجازبانىڭ بارلىق قاتىسۋشىلارى انىقتالدى. قىلمىستىق ءىس بويىنشا تەرگەۋ بارىسىندا ەكى تاراپتان دا جاۋاپ الىنادى»، - دەپ حابارلادى پوليتسيادان.

سوتقا دەيىنگى تەرگەپ- تەكسەرۋ بارىسىندا وقيعانىڭ بارلىق فاكتىلەرى، سەبەپتەرى مەن ءمان- جايى انىقتالادى. تەرگەۋ ناتيجەسى بويىنشا پروتسەسسۋالدىق شەشىم قابىلدانادى.