قازاقتىڭ ۇلتتىق قۇندىلىعىن ناسيحاتتاۋعا ەكپىن قويامىن - 100 جاڭا ەسىم - باھارگۇل تولەگەن
«بۇل جوبا («100 جاڭا ەسىم») تۋرالى مەنەن سۇحبات الۋعا كەلگەن جۋرناليستەردەن ەستىگەن بولاتىنمىن. سۇحبات بارىسىندا مەنىڭ وسى جوباعا قاتىسىپ كورۋىمە بولاتىنىن ايتىپ، وي سالدى. كەيىنىرەك، جوبا تۋرالى ىزدەنىپ، وقىپ كوردىم. جوباعا قاتىسۋ ءۇشىن قويىلعان تالاپتارعا ساي بولعاندىقتان، قاتىسىپ كورۋگە بەل بۋدىم. مەنىڭ ويىمشا، بۇل جوبادا مەنىڭ ۇلتتىق قۇندىلىقتارىمىز بەن سالت- ءداستۇرىمىزدىڭ بارىنشا ساقتالىپ، جاھاندانۋ زامانىندا جۇتىلماۋ ءۇشىن ۇلتتىق قۇندىلىقتى ناسيحاتتاپ جۇرگەنىم باسا نازارعا الىندى. وعان قوسا، قازاقستاندا تۇڭعىش رەت جەكە مۇراجاي اشقانىم ەسەپكە الىنعان بولۋ كەرەك. قازىرگى «ادەمى- اي» مۋزەيى ادىلەت مينيسترلىگىندە تىركەلگەن تۇڭعىش جەكە مۋزەي بولىپ وتىر. بۇل 15 جىل بويى انتيكۆاريات، تۇرمىستىق زاتتار جانە كۇمىس زەرگەرلىك بۇيىمداردى ىزدەستىرۋ مەن ۇيىمداستىرۋدىڭ ناتيجەسى. ونىڭ ەشبىرىن ساتپايمىن. وسكەلەڭ ۇرپاققا كورسەتۋگە جىل سايىن «ۇلت جاۋھارلارى» دەگەن كورمەنى ۇيىمداستىرىپ، قازاقتىڭ كونە ونەرىن حالىق اراسىندا ناسيحاتتاپ، ونىڭ ۇمىتىلماۋى ءۇشىن قىزمەت ەتىپ كەلەمىن. «ۇلت جاۋھارلارى» دەگەن فوتوالبوم دا شىققان ەدى»، - دەدى باھارگۇل تولەگەن.
ونىڭ ايتۋىنشا، انتيكۆاريات، تۇرمىستىق زاتتار جانە زەرگەرلىك بۇيىمدار سالاسىنا، كاسىپكە دەگەن قىزىعۋشىلىعىم بالا كەزدەن باستاۋ العان.
«ادەمىلىكتى بالا كەزدەن جاقسى كورەمىن. ودان كەيىن، ستۋدەنت كەزىمدە دە تاريح جانە ەتنوگرافياعا قىزىعۋشىلىق تانىتتىم. قىتاي انتيكۆارياتتىق بۇيىمدارى ساقتالعان مۇراجايلارعا ءجيى باراتىنمىن. وقۋىمدى اياقتاعان سوڭ، قازاقستانعا كەلدىم. 90 -جىلدار اۋمالى- توكپەلى كەزەڭ ەدى. سول كەزدە بيزنەسىمدى باستادىم. ول كەزدە بوس تۇرعان سالانى تولىقتىردىم دەسەم دە بولادى. ول كەزەڭدە حالىقتىڭ سالت- ءداستۇرى السىرەپ قالعان ەدى. مادەني قۇندىلىقتاردى ناسيحاتتايتىن ادام كەرەك بولدى. سوندىقتان وسى بيزنەستى ۇلتجاندى ازامات رەتىندە باستادىم دەپ ايتۋعا بولادى. وسىلايشا، ءوزىم سۇيگەن جانە جۇرەكتىڭ قالاۋىمەن وسى كاسىپتى باستادىم»، - دەدى ول.
وسى ورايدا ب. تولەگەن نارىقتا تابىستى بولۋ، اتالعان «ادەمى- اي» ساۋدا بەلگىسىن ومىرشەڭ ەتۋدى، عاسىرلىق ەتۋدى ارماندايتىنىن ايتتى. ۇلتتىق كادەسىيلاردىڭ سانى ارتىپ، حالىقتىڭ سۇرانىسىنا جاۋاپ بەرۋ ءۇشىن جۇمىسىن جالعاستىرا بەرمەك. ۇلتتىق كادەسىيلاردى كۇندەلىكتى ومىردە قولدانۋىن قامتاماسىز ەتىپ، الەمگە ۇلتتىق قۇندىلىق پەن جادىگەرلەردى پاش ەتۋدى كوزدەپ وتىر.
«دۇنيەجۇزىنە قازاقتىڭ ۇلتتىق قۇندىلىعىن ناسيحاتتاۋ ەلدىكتىڭ بەلگىسى دەپ ويلايمىن. سوندىقتان وسى جولدا تىنباي ەڭبەك ەتۋدى جالعاستىرامىن. جالپى، جوباعا قاتىسقانىما قۋانىشتىمىن. سەبەبى، ەڭبەگىمنىڭ ەلەنگەنىن بايقاپ، قانات بىتكەندەي بولدى. كۇش- قۋاتىمدى ارتتىردى. ول جوبادا «100 جاڭا ەسىم» بولىپ حالىققا تانىلعانداردىڭ قاتارىندا بولعانىم مەن ءۇشىن ۇلكەن مارتەبە، سونىمەن قاتار ۇلكەن جاۋاپكەرشىلىك. بۇل جوبا مەنىڭ حالىق اراسىندا تانىلىپ، ۇلت جاناشىرى، حالقىمىزدى سالت- ءداستۇرىن ناسيحاتاپ جۇرگەن ادام رەتىندە حالىق سۇيىسپەنشىلىگىن الدىم دەسەم ارتىق بولماس»، - دەدى باھارگۇل تولەگەن.
فوتو: 100esim.kazcontent.kz
اۆتور: رۋسلان عابباسوۆ