100 ەسىم: بالالار دارىگەرى اتا- انالارعا ارناپ مەكتەپ اشتى
ءتورت جىل بويى بالالاردى وڭالتۋمەن اينالىسىپ كەلە جاتقان دارىگەر ۆولونتەر جانە «28 پەتەل» حالىقارالىق قايىرىمدىلىق كلۋبىنىڭ ۆيتسە- پرەزيدەنتى بولىپ جۇمىس ىستەيدى. لاتيف پارپيەۆ بالالاردى قالاي ەمدەيتىنىن جانە ول قۇرعان جوبالاردىڭ ميسسياسى تۋرالى ايتىپ بەردى، دەپ حابارلايدى قازاقپارات ءتىلشىسى.
دارىگەردىڭ ايتۋىنشا، قوردىڭ جۇمىسى قازاقستاندا عانا ەمەس، شەتەلدە دە ناسيحاتتالىپ كەلەدى.
«2019 -جىلى بالالار مۇگەدەكتىگى مەن شالا تۋعان بالالار اراسىنداعى مۇگەدەكتىكتى زەرتتەي وتىرىپ، جاڭا باعىت اشۋعا شەشىم قابىلدادىم. مۇگەدەكتىگى بار بالالاردا پايدا بولاتىن بارلىق اسقىنۋلاردىڭ سيپاتى ءبىر - ءبارىنىڭ بىردەي بۇلشىقەت توبى زاقىمدالادى. ەرەسەك كەزەڭدە - ماسەلەن ەكى جاستان كەيىن بالالاردى ەمدەۋ قيىندايدى. سونداي- اق، بالالاردى ەرتە دياگنوستيكالاۋ بويىنشا ماماندار جەتىسپەيدى، ورتالىق جۇيكە جۇيەسى تاراپىنان قاتە دياگنوزدار قويىلادى»، - دەپ اتاپ ءوتتى دارىگەر جۋرناليستەرمەن سۇحباتىندا.
لاتيف پارپيەۆ «رەانيماتسيا جاعدايىندا بالالاردى ەرتە وڭالتۋ»، «جاڭا تۋعان نارەستەلەر پاتولوگياسى جاعدايىندا بالالاردى ەرتە وڭالتۋ» جانە «اتا- انالارعا ارنالعان مەكتەپ» اتتى جاڭا جوبالاردى اشقان. سپيكەردىڭ ايتۋىنشا، ولاردىڭ نەگىزگى ماقساتى - بالالار اراسىنداعى مۇگەدەكتىكتى ازايتۋ، كەيىنىرەك تۋىنداۋى مۇمكىن اسقىنۋلاردى ازايتۋ.
«ءبىر جارىم جىلدان بەرى باسقا قالالارعا بارىپ، دارىگەرلەردى تەگىن وقىتامىن جانە وڭ ناتيجەلەرى بايقالىپ كەلەدى. «اتا- انالارعا ارنالعان مەكتەپ» جوباسىندا العاش رەت بالالى بولعاندار بالاعا كۇتىم جاساۋدى، وتىرعىزۋدى، جۇرگىزۋدى ۇيرەنەدى. الەۋمەتتىك جەلىلەردە فيزيكالىق دامۋ كەزەڭدەرىن كورسەتەتىن ارنايى بەينەماتەريالدار بار»، - دەپ ءتۇسىندىردى ل. پارپيەۆ.
«28 پەتەل» كلۋبى 2012 -جىلدان بەرى 12 ەلدە جۇمىس ىستەيدى جانە 150 قالانى قامتيدى. دارىگەردىڭ ايتۋىنشا، 2,5 مىڭنان استام ەرىكتى كيىم توقىپ، ولاردى پەريناتالدىق ورتالىقتارعا وتكىزەدى. ال «بالالاردى ەرتە وڭالتۋ» جانە «اتا- انالارعا ارنالعان مەكتەپ» جوبالارى 2019 -جىلدان بەرى جۇمىس ىستەپ كەلەدى. «وڭالتۋدا ءار ءتۇرلى ەمدەر قامتىلادى. ءار بالاعا جەكە باعدارلاما تاڭدالادى - كينەزوتەراپيا، ماسساج، تۇزەتۋ ەمى، جاتتىعۋ تەراپياسى. دياگنوزعا بايلانىستى ارنايى ەمدەۋ كۋرستارىن تاڭدايمىز. مىسالى تسەرەبرالدى سال اۋرۋى نەمەسە نيەۆرولوگيالىق اۋرۋلارى بار بالالارمەن ۇزاق جۇمىس ىستەۋ كەرەك - ءبىر كۋرس ەمەس، 20-30 كۋرسقا سوزىلادى. مىسالى، ماعان ءتورت جاسار بالا كەلەدى، ونى اياققا تۇرعىزعانشا 36 وڭالتۋ كۋرسىنان وتتىك»، - دەيدى دارىگەر.
سونىمەن بىرگە، ل. پارپييەۆ «قازاقستاننىڭ 100 جاڭا ەسىمى» جوباسىنا قاتىسۋ تۋرالى ايتىپ بەردى.
«مەنى جوباعا ۇسىنعانى تۋرالى كەشە كەشكە ەستىدىم. ارينە، قۋاندىم. ەكىنشى جاعىنان، بۇل جوباعا قاتىسۋ وسىنداي دياگنوزى بار بالالارعا، ولاردىڭ اتا- انالارىنا كوبىرەك پايدا اكەلەدى دەپ ويلايمىن. كوپتەگەن بالالار وڭالتۋدى الا المايدى، ويتكەنى اتا- انالار بۇل تۋرالى بىلمەيدى. ەگەر ولار مەنى وسى جوبادا جەڭىمپاز ەتىپ تاڭداسا، ادامدار كوبىرەك حاباردار بولار ەدى جانە ودان دا كوپ بالالاردى قۇتقارۋعا بولادى. ەڭ باستىسى - بالالارعا كومەكتەسۋ»، - دەدى ل. پارپيەۆ.