ەلوردادا سانيتارلىق نورمالاردى ساقتاماعان 100 نىسان جابىلدى
بۇل جونىندە قالا اكىمدىگىنىڭ رەسمي سايتىنا سىلتەمە جاساپ قازاقپارات حابارلايدى.
رەيد بارىسىندا قوناق ۇيلەر، بازارلار، مەيرامحانالار مەن ءدامحانالار جانە باسقا دا كوپشىلىك ورىندار تەكسەرىلدى.
«بۇگىنگى تاڭدا ءبىز ەلوردالىق باس سانيتار دارىگەر قاۋلىسىنىڭ ساقتالۋىنا مونيتورينگ جۇرگىزۋدەمىز. وسى ۋاقىت ارالىعىندا سارىارقا اۋدانىنداعى 300 نىسانعا مونيتورينگ جۇرگىزىلدى. ونىڭ ىشىندە 100 نىساندا سانيتارلىق شارالار ساقتاماعان. نىساندار بۇل ولقىلىقتى تۇزەتكەنگە دەيىن جابىلدى. كاسىپكەرلەرگە ءتۇسىندىرۋ جۇرگىزىلدى. نىساندار ساننورمالاردى قاتاڭ ساقتاۋعا مىندەتتى: كىرە بەرىستە سانيتايزەرلەر (انتيسەپتيك) بولۋى ءتيىس، قىزمەتكەرلەر مەن كليەنتتەر بەتپەردە كيۋى كەرەك. سونداي-اق ۇستەل اراسىنداعى 2 مەتر قاشىقتىقتى ساقتاۋدى قامتاماسىز ەتۋ ماڭىزدى. كەلۋشىلەر ماسكا تاعىپ ءجۇرۋى قاجەت»، - دەپ اتاپ ءوتتى سارىارقا اۋداندىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى سانيتارلىق- گيگيەنالىق قاداعالاۋ ءبولىمى باسشىسىنىڭ مىندەتىن اتقارۋشى داميرا نۇران.
ەگەر كەلۋشى جوعارىدا اتالعان ەرەجەلەردىڭ ساقتامالماعانىن بايقاسا، 109 نومىرىنە حابارلاسۋعا نەمەسە تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسىنىڭ كەز كەلگەن بولىمشەسىنە شاعىمدانا الادى.
«بارلىق جاۋاپكەرشىلىكتى سەزىنىپ، ساننورمالاردى ساقتايتىن ازاماتتار بار. الايدا، ونى ەلەمەيتىندەر دە كەزدەسەدى. ءبىز جەتكىلىكتى مولشەردە انتيسەپتيك ساتىپ الدىق. كىرە بەرىستە قوناقتار مەن قىزمەتكەرلەر قولىن وڭدەي الادى. بارلىق جەردە جەلدەتۋ جۇيەسى قوندىرىلعان. بارلىق قۇرال- جابدىقتار، ونىڭ ىشىندە ۇستەلدەر مەن ورىندىقتار ارنايى سۇيىقتىقپەن وڭدەلەدى»، - دەيدى «يزبۋشكا» اسحاناسىنىڭ اكىمشىسى گۇلجاۋحار بيعاليەۆا.
كاسىپكەرلەر سانيتارلىق نورمالاردى قاتاڭ ساقتاۋى ءتيىس، ويتكەنى ىندەتتى جۇقتىرۋ قاۋپى ءالى دە ساقتالادى. سانيتارلىق نورمالار ساقتالماعان جاعدايدا، نىساندار ءوز جۇمىسىن توقتاتادى.
