جامبىلدا 100 گە جۋىق اسكەري كوروناۆيرۋس جۇقتىرعان
بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگ بارىسىندا وبلىس اكىمى بەردىبەك ساپاربايەۆ باياندادى، دەپ حابارلايدى قازاقپارات. ايماق باسشىسى ونلاين فورماتتا بريفينگىدە مەملەكەت باسشىسىنىڭ كوروناۆيرۋسقا قارسى ءىس- قيمىل جانە داعدارىسقا قارسى شارالار جونىندەگى تاپسىرمالارىنىڭ ورىندالۋ بارىسىنا جان- جاقتى توقتالدى.
27 - مامىرداعى جاعداي بويىنشا وبلىستا كوروناۆيرۋستىڭ 358 جاعدايى تىركەلگەن. بارلىق انىقتالعان وقيعالاردىڭ 30 ى ايماققا سىرتتان كەلسە، 99 ى اسكەري، 22 ءسى مەديتسينا سالاسىنىڭ، 7 ەۋى پوليتسيا قىزمەتكەرى. سونداي- اق، ەمدەلىپ شىققانداردىڭ سانى 173 كە جەتكەن. ال ءبىر ادام قايتىس بولعان، الايدا ول پاۆلودار وبلىسىنىڭ تۇرعىنى. وبلىستا 7 زەرتحانا جۇمىس جاساپ جاتىر. وندا بارلىعى 23753 ادام تەستىلەۋدەن وتكەن.
«قازىرگى تاڭدا جۇقپالى اۋرۋحانادا 132 ادام جاتىر. نەگىزىنەن ولاردىڭ بارلىعىنىڭ جاعدايى ورتاشا. دارىگەرلەردىڭ باقىلاۋىنا الىنعان. ءۇي كارانتينىندە 1580 ادام وقشاۋلانعان. جالپى وسى اۋرۋعا شالدىققانداردى ەمدەۋ ءۇشىن وڭىردە 1424 ورىن دايىندالىپ، وعان قوسىمشا 80 پروۆيزورلىق ورنى اشىلدى. وسى جۇمىستاردى ساپالى جۇزەگە اسىرۋ ءۇشىن 867 مەديتسينا قىزمەتكەرلەرى تارتىلعان. مەديتسينا قىزمەتكەرلەرىنە ارنالىپ التى قوناقۇي دايىندالدى. قازىر وندا 246 مەديتسينا سالاسى قىزمەتكەرلەرى ۋاقىتشا تۇرىپ جاتىر»، - دەدى ب. ساپاربايەۆ.
جالپى وسى مەديتسينا جانە پوليتسيا قىزمەتكەرلەرىن، اسكەريلەردى ءتيىستى قۇرال- جابدىقپەن، رەگيسترلەرمەن قامتاماسىز ەتۋ ءۇشىن 1,5 ميلليارد تەڭگە قارجى بولىنگەن. مەملەكەت باسشىسىنىڭ تاپسىرماسىنا سايكەس 2,5 مىڭ مەديتسينا قىزمەتكەرىنە 400 ميلليون تەڭگەدەن استام جاردەماقى تولەنگەن. سونداي- اق، وبلىس اكىمى بۇگىندە تەكسەرۋدى جەدەلدەتۋ ءۇشىن 7 زەرتحانا جۇمىس ىستەيتىنىن ايتتى. حالىقتىڭ سۇرانىسىن تەزىرەك ورىنداۋ ءۇشىن، سۇراقتارىنا جاۋاپ بەرۋ ءۇشىن ارنايى 109 جاردەم شتابى قۇرىلدى. بۇگىنگى كۇنگە دەيىن شتابقا 24 مىڭعا جۋىق سۇراق ءتۇسىپتى. وسىعان دەيىن وڭىردە 44 بلوكپوست جۇمىس ىستەگەن. جەڭىلدەتۋ شارالارىنا سايكەس بۇگىندە ولاردىڭ 25 ءى عانا قالعان. سول بلوكپوستارعا 222 ادام، 60 قا جۋىق تەحنيكا تارتىلعان. ولار بەكىتىلگەن الگوريتمگە سايكەس جۇمىستى جالعاستىرىپ كەلەدى.
