جەمقورلىق تۋرالى حابارلاعاندارعا ءوز قالتامنان 100 مىڭ تەڭگە بەرەمىن - تەستىلەۋ ورتالىعىنىڭ باسشىسى
وسى ورايدا، 100 مىڭ تەڭگە سوماسىنداعى سىياقىنى ق ر ب ع م ۇلتتىق تەستىلەۋ ورتالىعىنىڭ ديرەكتورى مىندەتىن اتقارۋشى ديدار سماعۇلوۆ ءوز قالتاسىنان تولەۋگە دايىن ەكەنىن ءمالىم ەتتى، دەپ حابارلايدى قازاقپارات ءتىلشىسى.
«الەۋمەتتىك جەلىلەردە ۇلتتىق تەستىلەۋ ورتالىعى تەستىلەردى ساتىپ جاتىر دەگەن قاۋەسەتتەر تاراعان بولاتىن. بۇل رەتتە وسى تەكتەس اقپاراتتاردى جوققا شىعارعىم كەلەدى. ورتالىقتاعى قىزمەتكەرلەردىڭ، ارىپتەستەرىمنىڭ ءوز ىسىنە ادال ەكەنىن سەنىممەن ايتا الامىن. وكىنىشكە قاراي، الەۋمەتتىك جەلىدە تەست جاۋاپتارى ساتىلىپ جاتقاندىعى تۋرالى ءجيى ايتىلادى. تەكسەرۋ ناتيجەسىندە بۇل جالعان اقپارات بولىپ شىعادى نەمەسە بىرنەشە جىل بۇرىنعى تەستىلەر ەكەنى انىقتالادى» ، - دەپ توقتالدى د. سماعۇلوۆ جەمقورلىقپەن كۇرەس شارالارىنا ارنالعان كەڭەستە.
«وزدەرىڭىز بىلەسىزدەر، سىبايلاس جەمقورلىق فاكتىلەرىن حابارلاعانى ءۇشىن ىنتالاندىرۋ بار. بۇدان بولەك، جەمقورلىق فاكتىسى بويىنشا 100 مىڭ تەڭگە سوماسىندا سىياقى ەنگىزبەكپىز. بۇل بيۋدجەت قارجىسىنان تولەنبەيدى، بۇل سومانى ءوزىمنىڭ جەكە قاراجاتىمنان بولەمىن. ءبىزدىڭ سالاداعى جەمقورلىققا قاتىستى كەز كەلگەن ناقتى اقپاراتتى حابارلاعاندارعا اتالعان سىياقىنى بەرۋگە دايىنمىن. اتاپ ايتقاندا، ءوز ارىپتەستەرىمنىڭ تازا ەكەنىنە سەنىمدىمىن. وسى كىسىلەرمەن جارتى جىلدان استام ۋاقىت جۇمىس ىستەپ كەلەمىن» ، - دەدى ۇلتتىق تەستىلەۋ ورتالىعىنىڭ ديرەكتورى مىندەتىن اتقارۋشى.
وسى ورايدا، جەمقورلىققا قاتىستى حابارلاعان ادامداردىڭ قۇپيالىعى ساقتالاتىنىن جەتكىزدى.
«الەۋمەتتىك جەلىلەردە مەنىڭ پاراقشالارىم اشىلعان، تەلەفون نومىرلەرى دە كورسەتىلگەن. ءبىز جەمقورلىق فاكتىلەرى تۋرالى اقپاراتتى سىياقى تولەپ قابىلداۋعا دايىنبىز. كەيىننەن بۇل مالىمەتتەر سىبايلاس جەمقورلىققا قارسى ءىس- قيمىل اگەنتتىگىنە تاپسىرىپ، بۇل تۇرعىدا قاجەتتى شارالار قابىلدانادى» ، - دەدى ديدار سماعۇلوۆ.
