ەلىمىزدەگى ەڭ جاس مەكتەپ ديرەكتورى «100 جاڭا ەسىم» قاتارىنان كورىندى

«قازاقستاننىڭ 100 جاڭا ەسىمى» جوباسىنا وراي ۇيىمداستىرىلعان سالتاناتتى جيىندا جەڭىمپازداردىڭ ءبىرى - ەلورداداعى 54-مەكتەپتىڭ ديرەكتورى شاكارىم سەيسەمباي ءسوز باستادى.

ول - ەلىمىزدەگى ەڭ جاس مەكتەپ ديرەكتورى.

«ءبىزدىڭ مەكتەبىمىزدە 213 قىزمەتكەر، 2700 وقۋشى بار. ۇستازدىق قىزمەتتەگى ماقساتىم - مەملەكەتىمىزدىڭ ءبىلىم سالاسىن برەندكە اينالدىرىپ، مارتەبەسىن ارتتىرۋ. قازىرگى تاڭدا وكىنىشكە قاراي، جاستاردىڭ ىشىندە، ءبىلىمدى ازاماتتاردىڭ اراسىندا مەكتەپكە بارىپ، ۇستاز بولىپ ءبىلىم بەرۋ - ۇردىسكە اينالماعان. ال ءبىزدىڭ نەگىزگى بايلىعىمىز - جەر استىنداعى التىن ەمەس، حالقىمىزدىڭ ۇشان- تەڭىز ءبىلىمى. سول سەبەپتەن، بىزگە مىقتى ۇستازدار كەرەك. سەبەبى، حاننىڭ دا، قارانىڭ دا ومىرلىك ۇستازدارى بولعان»، - دەدى ول.

شاكارىم سەيسەمباي ماعجان جۇمابايەۆتىڭ «التى الاشتىڭ باسى قوسىلسا - توردەگى ورىن ۇستازدىكى» دەگەن ءسوزىن ەسكە سالدى.

«ءبىزدىڭ مەكتەپتەرگە بەلگىلى ءبىر بالانس كەرەك. ياعني، ەر مۇعالىمدەردىڭ سانىن ارتتىرۋ كەرەك. مەكتەپ - وتباسى سەكىلدى. جانۇيادا اكەدەن، انادان تاربيە كورگەن بالا جامان بولمايدى. سوندىقتان، ەر ازاماتتاردى مەكتەپكە قىزمەتكە شاقىرامىن. وسى بىرەگەي جوبا اياسىندا جاستارعا وي سالىپ، ۇستازدىق مارتەبەسىن ارتتىرامىن دەگەن ءۇمىتىم بار»، - دەدى ول.

ايتا كەتسەك، «قازاقستاننىڭ جاڭا ەسىمدەرى» جوباسىنىڭ ماقساتى - تاۋەلسىزدىك جىلدارى قازاقستاننىڭ دامۋىنا ەلەۋلى ۇلەس قوسقان ادامداردىڭ تاريحى مىسالىندا تابىستىلىق، باسەكەگە قابىلەتتىلىك، پراگماتيزم جانە بىلىمگە تابىنۋ يدەيالارىن ىلگەرىلەتۋ. بيىل جوباعا قاتىسۋ ءۇشىن 1673 انكەتا قابىلدانعان. جالپى، بارلىق قاتىسۋشىعا 700 مىڭنان اسا داۋىس بەرىلگەن. بارلىق كەزەڭنىڭ قورىتىندىسى بويىنشا بيىل 32 جەڭىمپاز انىقتالدى.

اۆتور: ايان بەكەن ۇلى