قازاقستاننىڭ 100 مۇعالىمى ءۇش تىلدە ءبىلىم بەرۋگە ارنالعان جوبالارىن تانىستىردى
باعدارلامانىڭ جابىلۋ سالتاناتىندا 100 مۇعالىمنەن جاساقتالعان 25 كوماندا ا ق ش-تىڭ قازاقستانداعى ۋاقىتشا سەنىمدى وكىلى تەودور لينگكە جانە نازاربايەۆ ۋنيۆەرسيتەتىنىڭ ۆيتسە- پرەزيدەنتى قاديشا دايىروۆاعا ءوز جوبالارىن تانىستىردى.
2019 -جىلدىڭ ساۋىرىندە بولل ستەيت ۋنيۆەرسيتەتىنىڭ پروفەسسورلارى قاراعاندى، قوستاناي، پاۆلودار، وسكەمەن جانە اقتوبە قالالارىنىڭ 50 عىلىمي- جاراتىلىستانۋ پاندەرى جانە 50 اعىلشىن ءتىلى مۇعالىمىنە جوبالىق وقىتۋ نەگىزىندەگى كاسىبي دامۋ ترەنينگىن وتكىزگەن. مامىر مەن ماۋسىم ايلارىندا 100 ءمۇعالىم ونلاين وقۋدان ءوتىپ، 8-26 -شىلدە ارالىعىندا نازاربايەۆ ۋنيۆەرسيتەتىندەگى ترەنينگكە قاتىسقان.
مۇعالىمدەردى دايارلاۋ بويىنشا بولل ستەيت زەرتتەۋ ۋنيۆەرسيتەتىنىڭ ءۇش اپتالىق باعدارلاماسىن قازاقستانداعى اقش ەلشىلىگى قارجىلاندىرعان. ەلشىلىكتەگى مادەنيەت بويىنشا اتتاشە ەنن پەررەلليدىڭ ايتۋىنشا، جوبانىڭ باستى ماقساتى - قازاقستانداعى ءۇش تىلدە ءبىلىم بەرۋدى جەتىلدىرۋ جانە وقۋ-ادىستەمەلىك ماتەريالداردى كوبەيتۋ.
«ا ق ش ەلشىلىگى قازاقستان ۇستازدارىنىڭ اعىلشىن ءتىلىن ءبىلۋ دەڭگەيىن كوتەرەتىن بۇل جوباعا قۋانا- قۋانا قولداۋ بىلدىرەدى. ۇشتىلدىلىك - ءورشىل باستاما، سوندىقتان وعان قولداۋ ءبىلدىرۋدى ۇيعاردىق. بۇگىنگى جوبا وتە قىزىقتى، سەبەبى وندا ءتۇرلى تاسىلدەر، STEM (Science, technology, engineering, and mathematics) باعىتىنداعى تەحنولوگيالار قولدانىلادى. ترەنينگكە قاتىسقان مۇعالىمدەردىڭ كوپشىلىگى ورتا مەكتەپتە ساباق بەرەدى، باستاۋىش سىنىپ مۇعالىمدەرى دە بار. ءبىزدىڭ ويىمىزشا، بۇل ۇلكەن جۇمىس، STEM وقىتۋشىلارىنىڭ باسىم بولىگى اعىلشىن ءتىلىن ءبىلۋ مىندەتتى ەمەس دەپ ويلايدى. ءبىراق، اعىلشىن ءتىلىن ءبىلۋ ارقىلى الەم بويىنشا ەڭ ۇزدىك رەسۋرستارعا قول جەتكىزەدى. ءتۇرلى باعدارلامالارعا قاتىسا الادى. جوبا بيىل العاش رەت ۇيىمداستىرىلدى. كەلەسى جىلى دا ءوز جالعاسىن تابادى دەپ ۇمىتتەنەمىز»، - دەدى قازاقستانداعى ا ق ش ەلشىلىگى مادەنيەت بويىنشا اتتاشە ەنن پەررەللي.
سونىمەن بىرگە، جوباعا نازاربايەۆ ۋنيۆەرسيتەتىنىڭ ۇزدىكسىز ءبىلىم بەرۋ دەپارتامەنتىنىڭ اعىلشىن ءتىلى وقىتۋشىلارى دا شاقىرىلعان. بىرلەسكەن جوبا ناتيجەسىندە ءپان مۇعالىمدەرىنە قاجەتتى وقىتۋعا ارنالعان رەسۋرستار ازىرلەندى.
«ءوز قالامىزدىڭ مۇعالىمدەرمەن بىرىگىپ، بارلىق وڭىردەگى ۇستازدارعا پايدالى بولاتىن ماتەريال ازىرلەدىك. بۇل ماتەريالدار ەلەكتروندى تۇردە بارشاعا قولجەتىمدى. ازىرگە مۇندا 5-سىنىپقا ارنالعان ينفورماتيكا ءپانىنىڭ ماتەريالدارى توپتاستىرىلعان. مۇندا ءپان مۇعالىمى بارلىق تاقىرىپتى ىزدەپ تابا الادى. تەرمينولوگيا بولىمىندە اعىلشىن تىلىندەگى تەرميندەر، سوزدىك ۆيدەوسى بار، ءتۇرلى جاتتىعۋلار مەن قورىتىندى تەستىلەۋ ەنگىزىلگەن»، - دەدى تەمىرتاۋلىق مۇعالىم تاتيانا كون.
ونىڭ ايتۋىنشا، بالالار مەن مۇعالىمدەر بۇل جوبانى ينتەرنەتسىز دە قاراي الادى.
«سونداي-اق، بۇل ساباققا كەلە الماي قالعان بالالار ءۇشىن ءتيىمدى بولماق. مۇعالىمدەر ەلەكتروندى جوبانى بالاعا جىبەرە الادى. بۇل ازىرگە جوبانىڭ جوسپارى عانا. قازىر ماتەريالدار جيناقتاپ، تاجىريبەدەن وتكىزىپ، مۇعالىمدەردىڭ پىكىرىن تىڭدايمىز. ەگەر جوبانى پايدالى دەپ تاپسا، وزگە سىنىپتارمەن جانە وزگە پاندەرمەن دە جۇمىس ىستەيمىز»، - دەدى مۇعالىم.
پاۆلودار قالاسىنان كەلگەن ءۇمىت تۇكتىبايەۆا، ايگەرىم حاميتوۆا، مەرۋەرت ءبىلالوۆا جانە امانجول تاڭات تىلدىك كەدەرگىلەردى جويىپ، اعىلشىن ءتىلىن ۇيرەنۋ قابىلەتىن دامىتاتىن ۆەب-رەسۋرس قۇرعان.
«باستاپقىدا ءبىز بيولوگيا، كومپيۋتەرلىك تەحنولوگيالار جانە اعىلشىن ءتىلى پاندەرى بويىنشا ۆەب- رەسۋرس جاسايمىز. وسىلايشا، مۇعالىمدەر مەن وقۋشىلارعا تىلدىك كەدەرگىلەردەن ارىلۋعا، اعىلشىن تىلىندە ەركىن سويلەۋىنە كومەكتەسەمىز»، - دەدى مۇعالىمدەر.
2019 -جىلدىڭ قاراشا ايىندا قاتىسۋشىلار اتالعان ترەنينگكە قاتىسقانىن راستايتىن Ball State University رەسمي حاتىن الادى. ودان كەيىن مۇعالىمدەر كوماندالارى ءوز وڭىرلەرىندە جوبالارىن جەتىلدىرىپ، وزگە ارىپتەستەرىنە تانىستىرادى.
اۆتور: ايجان سەرىكجان قىزى