ءامينا ءومىرزاقوۆانىڭ 100 جىلدىعى يۋنەسكو كولەمىندە تويلانادى
«ق ر مادەنيەت جانە سپورت مينيسترلىگىنىڭ قولداۋىمەن ەل تاريحىندا تۇڭعىش رەت تەاتر جانە كينو سالاسى ءارتيسىنىڭ اتىنا ارناپ، يۋنەسكو كولەمىندە تويلاۋ، ەسكە الۋ شارالارى وتەدى.
ءامينا ەرقوجا قىزى 1949-جىلدان ءومىرىنىڭ سوڭىنا (2006-جىلى 26-قىركۇيەك) دەيىن، جارتى عاسىردان استام ع. مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاس وسپىرىمدەر تەاترىندا قىزمەت ەتتى. كوپتەگەن كينوفيلمدەر مەن تەاتر قويىلىمدارىنداعى تالعامپاز بەينەلەرى ارقىلى، حالىق قالاۋلىسىنا، ەل ارداعىنا اينالعان، ۇلتتىق ونەرىمىزدە ەسىمى ەل ەسىندە جاتتالعان - ءامينا ءومىرزاقوۆانىڭ تۋعانىنا 2019-جىلدىڭ 8- ناۋرىزىندا 100 جىل تولادى»، - دەلىنگەن ق ر مادەنيەت جانە سپورت مينيسترلىگى تاراتقان حابارلامادا.
ايتا كەتسەك، ءامينا ءومىرزاقوۆا 1919-جىلى 8- ناۋرىزدا شىعىس قازاقستان (بۇرىنعى سەمەي) وبلىسىنىڭ اباي اۋدانىندا ومىرگە كەلگەن. 1938-جىلى لەنينگراد قالاسىنداعى تەاتر ينستيتۋتىن ءبىتىرىپ، ونەردەگى العاشقى ەڭبەك جولىن شىمكەنت وبلىستىق دراما تەاترىنا جولدامامەن قىزمەتكە كەلۋدەن باستاعان.
ءا. ءومىرزاقوۆا قازاق تەاتر ساحناسىندا 68 جىل بويى قىزمەت ەتتى. ول سول ۋاقىت ىشىندە 150 دەي رولدەردى سومدادى. ونىڭ كينو سالاسىنا سىڭىرگەن ەڭبەگى دە ۇشان-تەڭىز. ول تۇسكەن 20 شاقتى كينوفيلم قازاق جۇرتىنا كەڭىنەن تانىس. تەاتر مەن كينو ونەرىنىڭ تانىمال تۇلعاسى - ءامينا ەرقوجا قىزى ءار جىلدارى «قازاق س س ر- ءىنىڭ ەڭبەك سىڭىرگەن ءارتىسى»، «قازاق س س ر- ءىنىڭ حالىق ءارتيسى» قۇرمەتتى اتاقتارىن، «قازاق س س ر جوعارعى سوۆەتىنىڭ قۇرمەت گراموتاسىمەن»، «ەڭبەك ەرلىگى ءۇشىن»، «ەڭبەك ارداگەرى» ماراپاتارىن يەلەنگەن.
