قازاقستاندا 100 جاڭا فەرما قۇرۋ جوباسى جۇزەگە اسىرىلادى
بۇل تۋرالى بۇگىن Astana Agroforum-2018 رەسپۋبليكالىق كەڭەسىندە «اۋىل - ەل بەسىگى» ارنايى جوباسىن تانىستىرعان ق ر اۋىل شارۋاشىلىعى ءمينيسترىنىڭ كەڭەسشىسى ساكەن قالقامانوۆ ايتتى، دەپ حابارلايدى قازاقپارات ءتىلشىسى.
ونىڭ ايتۋىنشا، اتالعان ارنايى جوبا اياسىندا 100 جاڭا فەرما قۇرۋ كوزدەلىپ وتىر.
«ءبىز كەپكىسى شاڭ، قولى ماي-ماي ەمەس، بىرنەشە ءتىلدى جەتىك بىلەتىن، جوعارى ءبىلىم العان، سوعان قاراماستان اۋىلدىق جەردە ەڭبەك ەتىپ، تابىس تاباتىن جاستاردىڭ الەۋەتىن اشۋىمىز كەرەك»، - دەدى ول.
سونىمەن قاتار، ساكەن قالقامانوۆ تەلەارنالاردا پرايم-تايم ۋاقىتىندا اگروونەركاسىپ تاقىرىبىندا توك-شوۋ ۇيىمداستىرۋ جۇمىسى جۇرگىزىلىپ جاتقانىن ايتتى.
بۇعان دەيىن حابارلاعانىمىزداي، ءمينيستردىڭ كەڭەسشىسى اعىمداعى جىلدىڭ العاشقى 6 ايىندا 44 مىڭ ادام اۋىلدان قالاعا قونىس اۋدارعانىن ايتقان بولاتىن.
«اۋىل مەكتەبىن بىتىرەتىن تۇلەكتەر اراسىندا «اۋىل ءومىرىنىڭ كەلەشەگى جوق» دەگەن تۇسىنىك باسىم. ولاردى قالالار قىزىقتىرادى. ءبىراق، ول جاقتا ەشكىم دە كۇتىپ تۇرعان جوق. بۇل تۇسىنىكتەن ارىلتۋ ءۇشىن اۋىل ءومىرىن قالادان كەم قىلمايتىنداي جۇيەلى ءارى سالاارالىق ءادىس كەرەك. وكىنىشكە قاراي، جاستار بۇگىندە جاڭا ءارى پروگرەسسيۆتى وتاندىق اۋىل شارۋاشىلىعىنىڭ شىنايى ءوسىم نۇكتەسىن كورمەي وتىر»، - دەدى ول.