سۋ تاسقىنى: تولاسسىز جاۋعان جاۋىننان 100 ادام قازا تاپتى
The Japan Times باسىلىمىنىڭ حابارلاۋىنشا، تاعى 50 ادام ءىز-ءتۇزسىز جوعالىپ كەتكەن.
بەيسەنبىدەن باستاپ جاپونيانىڭ باتىس بولىگىندە شىلدە ايىنداعى قالىپتى جاۋىن-شاشىن كولەمىنەن ءۇش ەسە كوپ جاڭبىر جاۋعان. ەكى ميلليون ادام وزەننىڭ ارناسىنان شىعىپ، تاسۋىنا بايلانىستى ەۆاكۋاتسيالانۋعا ءماجبۇر بولدى.
«ءبىز بۇرىن-سوڭدى مۇنداي جاڭبىردى كورگەن جوقپىز»، - دەپ مالىمدەدى جاپونيا مەتەو قىزمەتى.
قۇتقارۋشىلار دۇيسەنبى كۇنى تاڭەرتەڭ بولعان لاي كوشكىنىنەن امان قالعاندار نەمەسە قازا تاپقانداردىڭ دەنەسىن ىزدەستىرىپ جاتىر.
وكاياما پرەفەكتۋراسىنىڭ رەسمي وكىلى ءمالىم ەتكەندەي، سۋدىڭ دەڭگەيى اقىرىن تومەندەپ جاتىر.
قازا تاپقانداردىڭ كوبى حيروسيما پرەفەكتۋراسىندا تىركەلگەن.
پرەمەر-مينيستر سيندزو ابە جەكسەنبى كۇنى قۇتقارۋشىلاردىڭ «تاۋلىك بويى جۇمىس ىستەپ جاتقانىن» حابارلادى.
«ءىز-ءتۇزسىز جوعالعان ادامدار كوپ، باسقالارعا كومەك كورسەتۋ قاجەت»، - دەدى ول جۋرناليستەرگە.
