قازاقستاندىق 100 ماگيسترانت پەن دوكتورانتقا فرانسيا ج و و- لارىنا گرانت بەرىلەدى
قازاقستاندىق تاراپتان كەلىسىمگە ءبىلىم جانە عىلىم ءمينيسترى ەرلان ساعاديەۆ، فرانسۋز تاراپىنان قازاقستانداعى توتەنشە جانە وكىلەتتى ەلشىسى فيليپپ مارتينە قول قويدى.
باعدارلاما اياسىندا ەكىنشى جىلعى ءبىلىم الۋشى 90 ماگيسترانت پەن قازاقستاندىق جوعارى وقۋ ورىندارىندا ءبىلىم الىپ جاتقان 10 دوكتورانت فرانسيانىڭ جوعارى وقۋ ورىندارىنا باراتىن بولادى.
ماگيسترانتتاردىڭ ءبىلىم الۋ مەرزىمى 10 اي (قىركۇيەك- ماۋسىم)، ال دوكتورانتتاردىڭ وقۋ مەرزىمى 3 جىل، ءار جىلدا 6 ايدان (قىركۇيەك- اقپان) ءبىلىم الادى.
قازاقستان تاراپى ءار ءبىلىم الۋشىعا ستيپەنديا تولەۋدى ءوز موينىنا الدى (1 ماگيسترانتقا - 800 ەۋرو؛ دوكتورانتقا - 1200 ەۋرو).
فرانسيا تاراپىنا تەگىن ءبىلىم الۋدى قامتاماسىز ەتۋ؛ مەملەكەتتىك جوعارى وقۋ ورىندارىندا تىركەۋ تولەمىنەن بوساتاتىن فرانسۋز ۇكىمەتىنىڭ ستيپەنديات مارتەبەسىن بەرۋ؛ فرانسۋز الەۋمەتتىك ساقتاندىرۋىنىڭ جالپى جۇيەسىنە تىركەۋ؛ تەگىن ۇزاقمەرزىمدى ستۋدەنتتىك ۆيزا؛ ستۋدەنتتىك جاتاقحانالاردا ورىنداردى ءبولىپ تاراتۋ كەزىندە باسىمدىلىقتى ۇسىنۋ؛ تۇرعىن جەردى تولەۋگە، سونىمەن قاتار «clé» جۇيەسىن پايدالانۋعا (تۇرعىن ءۇيدى جالعا العاندا فرانسۋز مەملەكەتى كەپىلگەر بولىپ تابىلاتىن كەزدە) كومەك الۋ؛ مادەني باعدارلامالار مەن ءىس- شارالارعا قاتىسۋ ءۇشىن جەڭىلدەتىلگەن تاريفتەردى قامتاماسىز ەتۋ سىندى ءبىرقاتار مىندەتتەمەلەر جۇكتەلدى.
باعدارلاما جاس زەرتتەۋشىلەردىڭ موبيلدىلىگىن دامىتۋداعى جاڭا يمپۋلستى، سونداي- اق عىلىم سالاسىنداعى سوڭعى يننوۆاتسيالارعا قولجەتىمدىلىكتى، فرانسۋز ءتىلدى ەلدەرمەن عىلىمي قاتىناستاردى كەڭەيتۋ ماقساتىنداعى ەۋروپالىق عىلىمي ورتالىقتار جانە زەرتحانالارمەن ىنتىماقتاستىقتى جانداندىرۋدى قامتاماسىز ەتەدى.
