قازاقستاندا ءۇش جىلدىڭ ىشىندە 100 مەكتەپ پەن كوللەدج ديرەكتورى سوتتالدى

الماتى. قازاقپارات - ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اليك شپەكبايەۆ «Sanaly urpaq jarqyn bolashak» فورۋمىندا ەلىمىزدىڭ مەكتەپتەرى مەن جوعارى وقۋ ورىندارىندا جەمقورلىقتىڭ ءجيى كەزدەسۋ سەبەپتەرى تۋرالى ايتتى، دەپ حابارلايدى قازاقپارات ءتىلشىسى.

اليك شپەكبايەۆتىڭ ايتۋىنشا، سىبايلاس جەمقورلىق ارەكەتتەرى رۇقسات بەرۋ راسىمدەرىنىڭ كوپتىگىمەن تىعىز بايلانىستى.

«بۇل مۇعالىمدەردىڭ ۇستازدىق سانات الۋى، قوسىمشا تاريفتەر مەن ساعاتتارعا يە بولۋى، سونىمەن قاتار، مەملەكەتتىك ساتىپ الۋلارداعى جەمقورلىق فاكتىلەرى بولىپ كەلەدى. سوڭعى 3 جىلدا ءبىلىم سالاسىنداعى 687 جەمقورلىق فاكتىسى تىركەلگەن، 226 ادام سوتتالدى. سوتتالعانداردىڭ اراسىندا 82 مەكتەپ، 17 كوللەدج، 70 بالاباقشا جەتەكشىسى، 29 ءبىلىم ءبولىمى باسشىسى بار. سىبايلاس جەمقورلىق فاكتىلەرىنىڭ سانى بويىنشا كوشباسشى - وڭتۇستىك قازاقستان وبلىسى. جوعارعى وقۋ ورىندارىندا 14 ميلليارد تەڭگە كولەمىندە 100 دەن استام قارجىلىق بۇزۋشىلىق تىركەلدى. سونىمەن قاتار، ۋنيۆەرسيتەتتەردىڭ گرانت ءبولۋ جۇمىستارىندا دا جەمقورلىق ارەكەتتەر بايقالعان»، - دەدى اليك شپەكبايەۆ.

ونىڭ ايتۋىنشا، قازىر اگەنتتىك سىبايلاس جەمقورلىقتىڭ الدىن-الۋمەن قاتار ونىڭ سەبەپتەرى مەن العىشارتتارىن انىقتاۋعا جانە جەمقورلىقتىڭ زارداپتارىن جويۋعا تىرىسۋدا.

«سىبايلاس جەمقورلىققا قارسى كۇرەستە تابىسقا جەتۋدىڭ جولى - كۇمان تۋدىرمايتىن باسقارۋشىلىق شەشىمدەردىڭ اشىقتىعى مەن انىقتىعى. كەز كەلگەن قىزمەت قاراپايىم جانە تۇسىنىكتى بولۋى كەرەك. ءبىلىم بەرۋ سالاسى سىبايلاس جەمقورلىق وقيعالارى ءوسىپ كەلە جاتقان قاۋىپتى سالاعا اينالۋدا. پرەزيدەنت تاپسىرماسى بويىنشا مەملەكەتتىك ورگاندار قازىر بۇل سالاداعى ەڭبەكاقىنى كوبەيتۋدى قولعا الدى»، - دەدى اليك شپەكبايەۆ.