الماتىلىق ايەل كۇنىنە 100 گە جۋىق مۇقتاج جاندى تەگىن تاماقتاندىرادى
استانا. قازاقپارات - الماتى تۇرعىنى مۇقتاج جانداردىڭ بارلىعىن دەرلىك تەگىن تاماقتاندىرعىسى كەلەدى. الايدا وعان راسيما تەمىربايەۆانىڭ قاراجاتى جەتكىلىكسىز.
مىنە، ەكى جىلدان بەرى ول قايىرىمدىلىق جوباسىنا اقشانى قايدان الامىن دەپ شارق ۇرىپ ءجۇر. ايەل جوباسىن ەگجەي- تەگجەيلى ويلاستىرعانىمەن، ەڭ ماڭىزدىسىن، ياعني دەمەۋشى جاعىن ەسكەرمەپتى، دەپ حابارلايدى ك ت ك ارناسى.
جالعا الىنعان كىشىگىرىم اسحانادا جۇمىس كوپ. ءدال قازىر اسپاز ەتتى ءبولىپ، ساڭىراۋقۇلاق قۋىرىپ جاتىر. تۇسىنگەن ادامعا بۇل تولىققاندى تۇسكى اس. سەبەبى مۇنداي تاماقتى مۇقتاجدارعا كۇندە بەرە المايمىن دەيدى جوبا اۆتورى راسيما تەمىربايەۆا.
«ەڭ تومەنگى مولشەردە زەينەتاقى الاتىن قارتتارعا كومەكتەسكىم كەلەدى. سەبەبى ولاردىڭ كوپشىلىگى بۇرىن ۇستازدىق، دارىگەرلىك جانە عىلىمي قىزمەتتە بولعاندار. الايدا ەلەۋسىز قالاتىن دا وسى كىسىلەر. ەڭ باستىسى، ولار مۇندا تەك اس ءىشۋ ءۇشىن ەمەس، ءوزارا اڭگىمەلەسۋ ءۇشىن كەلەدى» ، - دەيدى راسيما تەمىربايەۆا.
ايەل وسىدان ەكى جىل بۇرىن مۇقتادجاردى تاماقتاندىرا باستاعان. العاشقىدا تەگىن اس ىشۋگە كەلەتىندەر سانى از بولسا، بۇگىندە جۇزگە جۋىق قارت راسيمانىڭ ارقاسىندا تۇسكى اسپەن قامتىلىپ وتىر. تەگىن اسقا كەلگىسى كەلەتىندەر سانى كۇن ساناپ ارتىپ بارادى. الايدا بارلىعىن بىردەي تاماقتاندىرۋعا راسيمانىڭ قاراجاتى جەتپەيدى. ول، ەڭ الدىمەن، كوپبالالىلارعا، زەينەتكەرلەر مەن جۇمىسسىزدارعا كومەكتەسەدى ەكەن.
قازىرگى تاڭدا جوبا اۆتورىمەن تۇراقتى تۇردە جالعىز قۇس فابريكاسى جۇمىس ىستەيدى ەكەن. اتالعان مەكەمە تەگىن اسحاناعا ەكى اپتادا ءبىر رەت ەت پەن جۇمىرتقا جەتكىزىپ تۇرادى. كەيدە قايىرىمدى جاندار دا كومەك قولىن سوزادى. الايدا ول دا جەتكىلىكسىز. تەگىن تاماق تەز تاۋسىلىپ كەتەدى. ال مۇقتاج جاندار مۇندا تاڭەرتەڭنەن باستاپ كەزەككە تۇرادى ەكەن.
«زەينەتاقىمدى ۇرلاپ كەتتى. ەندى تاماققا اقشام جەتكىلىكسىز» ، - دەيدى زەينەتكەردىڭ ءبىرى ۆلاديمير دەمەنتيەۆ.
«تەگىن اس ەشكىمگە دە ارتىق ەتپەيدى عوي. اش قالعان ەمەسپىن، ءبىراق سوندا بۇل دەگەنىڭىز ۇلكەن كومەك. ريزامىن، تۇسكى استان قالماۋعا تىرىسامىن» ، - دەيدى مۇراتبەك اۋباكىروۆ.
تۇسكى اس كۇن سايىن بەرىلەدى. راسيما تەك دەمالىس كۇندەرى مەن مەيرامداردا دەمالادى. جوبا اۆتورى تەگىن اسحانانى قازاقستاننىڭ ءار تۇكپىرىنەن اشسام دەيدى. ەرىكتىلەر مەن دەمەۋشىلەر كومەك قولىن سوزام دەسە، مارحابات.
