داۋرەن ابايەۆ: «100 جاڭا تۇلعا» جوباسىنا ءوتىنىم قابىلداۋ باستالدى
«ماحاببات ەسەننىڭ ويىن قۇپتايمىن. قوعامدا «100 جاڭا تۇلعا» جوباسى قالاي جۇزەگە اسىرىلاتىنى قىزۋ تالقىعا ءتۇسىپ جاتىر. جۇمىس توبىنىڭ تەڭ ءتوراعاسى رەتىندە وسى ماسەلە جونىندە تۇسىنىك بەرىپ وتكىم كەلەدى. ءبىز ۇمىتكەرلەر ءتىزىمىن قالىپتاستىرۋ بويىنشا الۋان ءتۇرلى الاڭدار، اسپاپتار، مەن دەرەككوزدەردى پايدالانۋعا نيەتتىمىز»، - دەپ جازدى ءوزىنىڭ فەيسبۋكتاعى پاراقشاسىندا مينيستر.
ونىڭ اقپاراتىنا سايكەس، بۇگىن El.kz ينتەرنەت-پورتالى بازاسىنداعى 100esim.el.kz سايتىندا ءوتىنىم قابىلداۋ باستالدى.
«ەگەر بىرەۋلەردىڭ ءومىر جولى، جەتىستىگى سىزگە ەرەكشە كورىنسە نەمەسە ءسىز ءوزىڭىز وسىعان لايىقتى بولساڭىز، وندا ءسىزدىڭ جوباعا قاتىسۋعا مۇمكىندىگىڭىز بار. ول ءۇشىن 100esim.el.kz سايتىن تاۋىپ، ءوتىنىمدى تولتىرۋ قاجەت»، - دەپ ءتۇسىندىردى داۋرەن ابايەۆ.
بۇدان باسقا، ونىڭ ايتۋىنشا، پىكىرى قوعامنىڭ سەنىمىنە يە بولعان سپورتتان باستاپ عىلىمعا دەيىنگى ءار سالاداعى ەلدىڭ ساراپشىلارى، ەڭبەك سىڭىرگەن قايراتكەرلەرىمەن بەلسەندى جۇمىس جۇرگىزۋ جوسپارلانۋدا.
«بۇل ادامدار قالىڭ جۇرتشىلىق بىلە بەرمەيتىن، دارىنى مەن تالابىنان زور ءۇمىت كۇتۋگە بولاتىن جاستار جايلى جاقسىراق بىلەتىنى ءسوزسىز، - دەپ اتاپ ءوتتى مينيستر داۋرەن ابايەۆ.
- جوبانىڭ جالپى ۇلتتىق ماڭىزدىلىعىن ەسكەرە وتىرىپ، ءبىز قوعامدىق باستامالاردى جوباعا بارىنشا تارتۋعا جانە وسى ماسەلە بويىنشا بارلىق ۇسىنىستاردى قاراۋعا ءازىرمىز. كەز كەلگەن ۇسىنىسقا اشىقپىن».
بۇدان بۇرىن جۋرناليست ماحاببات ەسەن الەۋمەتتىك جەلىدەگى پاراقشاسىندا قازاقستان پرەزيدەنتى باستاماشىلىق ەتكەن «100 جاڭا تۇلعا» جوباسى جايلى ويلارىمەن بولىسكەن.
