قازاقستان كەن ورىندارىنان كۇنىنە 100 كەلى التىن ۇرلانادى

 استانا. قازاقپارات - سوڭعى 5 -جىلدا 19 مىڭ ادام التىن ۇرلاپ ۇستالعان. ۇرلانعان التىندى وڭدەيتىن 75 تسەح اشكەرلەنىپ، وسى ۋاقىت ىشىندە 500 توننا شيكىزات تاركىلەنگەن.

بايىپ كەتەم دەپ، مايىپ بولىپ جاتقاندار دا بار. كەنىشتەرگە زاڭسىز كىرۋ ادام ومىرىنە قاۋىپتى بولسا دا، مۇنداي وقيعالار ازايار ەمەس. 2015 -جىلى 6 ادام قازا تاپقان. بۇگىن ءماجىلىس دەپۋتاتى مەرۋەرت قازبەكوۆا ۇكىمەت باسشىسىنا ساۋال جولداپ، زاڭسىز كاسىپكە تۇساۋ سالۋدى سۇرادى.

"التىندى زاڭسىز جولمەن ءوندىرۋ بويىنشا، تەك ستەپنوگور وڭىرىندە 2014-2015 -جىلدارى 9 ميلليارد تەڭگەنىڭ ءونىمى الىنباي قالدى. ال بيۋدجەتكە 2 ميلليارد تەڭگەنىڭ سالىعى تۇسپەگەن. ءوز ءومىرىن قاتەرگە تىگىپ، جەر استىنا كىرىپ جاتقانداردىڭ ءبارى امان شىعىپ جاتقان جوق. وسى ايتىلعانداردى نەگىزگە الا وتىرىپ، «اق جول» فراكسياسىنىڭ دەپۋتاتتارى ۇكىمەتتەن قۇندى مەتالداردىڭ اينالىمىن رەتتەۋدى، سونداي- اق حالىقتى جۇمىسپەن قامتۋدىڭ بالامالى جولدارىن ۇسىنۋدى سۇرايمىز" - دەدى قر پارلامەنتى ءماجىلىسىنىڭ دەپۋتاتى مەرۋەرت قازبەكوۆا.

 دەرەككوز: khabar.kz