جەتىسۋ ۋنيۆەرسيتەتى جەتىمدەر ءۇيىنىڭ 100 دەن استام تاربيەلەنۋشىسىن قوناققا شاقىردى

تالدىقورعان. قازاقپارات - العىس ايتۋ كۇنىنە وراي جەتىسۋلىق ستۋدەنتتەر «اينالايىن» بالالار ءۇيىنىڭ تاربيەلەنۋشىلەرىنە مەرەكە سىيلادى، دەپ حابارلايدى قازاقپارات ءتىلشىسى. قايىرىمدىلىق شاراسى اياسىندا 100 دەن استام بالا جەتىسۋ مەملەكەتتىك ۋنيۆەرسيتەتىنە قوناققا كەلىپ، ۇستازدار مەن تالىمگەردىڭ مەيىرىمىنە بولەندى.

جاستار ءوز كۇشىمەن كونتسەرتتىك باعدارلاما دايىنداپ، سىيلىقتارىن تابىستادى. بۇل يگى ءداستۇردىڭ قولعا الىنعانىنا نەبارى ەكى جىل بولسا دا، بالالار ءۇيىنىڭ شاكىرتتەرى ۇلكەن اعا- اپكەلەرىنە باۋىر باسىپ قالعان. سەبەبى ستۋدەنتتەر قاۋىمى اي سايىن ونداعى بالعىنداردى تۋعان كۇندەرىمەن قۇتتىقتاپ، قۋانتىپ تۇرادى. "بىزگە اي سايىن كەلىپ، سىيلىقتارىن بەرەدى، قۋانىش سىيلايدى. ءبىز ولاردى ءارقاشان اسىعا كۇتەمىز. وسىنداي مەيىرىمدى جانداردىڭ بولعانى ءۇشىن شەكسىز العىسىمىزدى بىلدىرەمىز»، - دەدى «اينالايىن» بالالار ءۇيىنىڭ تاربيەلەنۋشىسى الەكساندرا بەلونوسوۆا.

ايتا كەتۋ كەرەك، تالدىقورعانداعى اتالمىش الەۋمەتتىك مەكەمەدە 130 دان استام بالا تاربيەلەنۋدە.