جىل باسىنان بەرى 100 دەن استام اقتوبەلىك ايەلدى كۇيەۋى ساباعان
اقتوبەلىك ايەلدەر ۇرىپ- سوققان كۇيەۋلەرى مەن ازاماتتىق نەكەدە بىرگە تۇراتىن ەر ازاماتتاردى ءجيى كەشىرەدى. ايەلدەردى زورلىق- زومبىلىقتان قورعاۋ جونىندەگى ينسپەكتورلاردىڭ ايتۋىنشا، بىرنەشە رەت شاعىم ايتىپ، سوت الدىنا بارعاندا كەشىرىم بەرەتىندەردىڭ قاتارى ازايماي تۇر. وتكەن جىلى 16 قىلمىستىق ءىس قوزعالعان. بارلىعى 4 مىڭ ايەل ءزابىر كورگەنىن ەسەپتەگەندە، بۇل سوتقا جەتكەن دەرەكتىڭ ماردىمسىز ەكەنىن كورسەتەدى. ال ءۇش ايەل ەر مەن ايەل اراسىنداعى داۋ- جانجالدان سوڭ قازا بولدى.
«وتباسىداعى داۋ- جانجالدىڭ كوبى ىشىمدىك ىشۋدەن سوڭ تۋىندايدى. جىل باسىنان بەرى اراققا اۋەس 20 ادام كۇشتەپ ەمدەۋ ورنىنا جىبەرىلدى. سونىمەن قاتار، جارىنا ءتىل تيگىزىپ، بالاعاتتاپ، ار- نامىسىنا تيگەندەردىڭ سانى 190 عا جەتتى. قازىرگى كۇنى وبلىس بويىنشا 25 ايەلدى ۇرىپ- سوعۋ دەرەگى تىركەلگەن. ولاردى كۇيەۋلەرى مەن ازاماتتىق نەكەدەگى ەر ازاماتتار زابىرلەگەن. ال 88 نازىك جاندى جەڭىل دەنە جاراقاتىن العان. مۇنداي دەرەكتەر ازامايدى. ءبىزدىڭ ايەلدەردىڭ كوبى كەشىرىمشىل»، - دەيدى جەرگىلىكتى پوليتسيانىڭ ايەلدەردى زورلىق- زومبىلىقتان قورعاۋ جونىندەگى ينسپەكتورى مارينا نۇرىمجانوۆا.
دەنەسىنە جەڭىل- جەلپى زاقىم كەلگەن كەز كەلگەن ايەل بىردەن سوتقا جۇگىنە الادى. ال سوققىنىڭ استىندا قالىپ، دەنەسى كوگەرىپ جۇرەتىن ايەلدەر ءۇشىن وبلىستا 2016 -جىلدىڭ جەلتوقسانىندا داعدارىس ورتالىعى اشىلدى. ءبىراق بۇل ورتالىق ازىرگە نازىك جاندىلاردى قابىلداپ جاتقان جوق. مەملەكەتتىك- جەكە مەنشىك سەرىكتەستىك نەگىزىندە سالىنعان ورتالىقتىڭ قۇرىلىسى اياقتالعانىمەن، قۇجاتتارى راسىمدەلمەگەن. ۋادە بويىنشا 1-قاڭتاردا بارار جەرى قالماعان ادامدار وسى ورتالىقتى پانالاۋى ءتيىس ەدى. كاسىپكەر مەن اكىمدىك الداعى 10 جىلعا كەلىسىم جاساۋى ءتيىس بولىپ، ەكى ارا قىزمەت كورسەتۋ قۇنىن كەلىسە الماي وتىر.
مەتسەنات اسقاربەك مامىربايەۆتىڭ ايتۋىنشا، قۇجاتتار زاڭدى تۇردە رەتتەلسە، اقپاننىڭ ورتا تۇسىندا ورتالىق اشىلىپ، ايەلدەردى قابىلداي باستايدى.
اۆتور: التىناي ساعىندىقوۆا
