ەلىمىزدىڭ 100 برەندىن قالىپتاستىرىپ جۇرگەن كىم؟
«جالپى، وتاندىق ءونىم تاقىرىبىنا كەلگەندە ءبىراز توسىلاتىنىمىز راس. ويتكەنى، كوپشىلىك وتاندىق ونىمدەردىڭ ساپاسىنا سەنە بەرمەيدى. وزىمىزدە شىعاتىن تاۋارلاردى قىمبات دەپ سوگىپ تە جاتاتىندار دا بار. الايدا، مۇنىڭ بارلىعىن حالىققا دا، تاۋار وندىرۋشىلەرگە دە ءتۇسىندىرۋ جۇمىستارىنىڭ دۇرىس جۇرگىزىلمەۋىنەن دەر ەدىم. ايتپەسە، ءبىزدىڭ ەلىمىزدە شىعاتىن ونىمدەر يمپورتتىق تاۋارلاردان اسىپ تۇسپەسە، كەم ەمەس. تەك، كاسىپكەرلەرگە دە دۇرىس باعىت سىلتەپ، تاۋاردى وتكىزۋدىڭ جولدارىن ءتۇسىندىرۋ قاجەت»، - دەيدى ريمما تاجىبايەۆا.
وتاندىق تاۋارلاردى وتكىزۋدىڭ جولىن ىزدەگەن ريمما حانىم الىسقا بارماي، ميلان تاجىريبەسىنە سۇيەندى. بىلتىر يتاليادا وتكەن «ادامزاتتى تاماقتاندىرۋ» ەكسپو كورمەسىنە الەمنىڭ 114 ەلى قاتىسىپ، ءوز تاعامدارىن ءبىر پاۆيلون استىندا ۇسىنعان بولاتىن. بۇل جوبانىڭ قازاقستاندا دا تەز قولداۋ تاباتىنىنا سەنگەن ول تاۋەكەلگە بەل بۋىپ، وتاندىق تاۋار وندىرۋشىلەردى «حالىق ماركاسىنىڭ» استىنا جيناي باستادى.
«بۇل كەرەمەت يدەيا ەكەنىن جاسىرمايمىن. اسىرەسە، وتاندىق تاۋار وندىرۋشىلەر ءۇشىن بۇل ۇلكەن ساتۋ الاڭى بولدى. «حالىق ماركاسىن» تىركەۋدەن وتكىزگەن سوڭ، ارنايى سايت اشىپ، تاۋار وندىرۋشىلەردى تىركەي باستادىم. العاشىندا 30 تاۋار ءوندىرۋشىنىڭ تىركەلەگەنى جەڭىس بولادى دەپ ۇمىتتەندىم. الايدا، بۇل مەجە مەن ويلاعاننان دا كوپ بولىپ، 70 تاۋار ءوندىرۋشى «حالىق ماركاسىن» يەلەنىپ، سايتقا تىركەلدى. بۇل نەنى بىلدىرەدى؟ ياعني، ەلىمىزدەگى تاۋار وندىرۋشىلەر دە وسىنداي جوباعا ءزارۋ ەكەنىن كورسەتەدى. ولاردىڭ تاۋارلارىن وتكىزۋگە كومەكتەسەتىن، ورتاق پىكىر الماستىرۋعا سەپتىگىن تيگىزەتىن ورتا كەرەك ەدى. ءبىز دەرەۋ جۇمىسىمىزدى باستاپ كەتتىك. استاناداعى «حالىق ماركاسى» پاۆيلونىندا ارنايى سەرتيفيكاتتان وتكەن وتاندىق ونىمدەر ساتىلىپ جاتىر»، - دەيدى جوبا اۆتورى.
ريمما تاجىبايەۆا ەندى ەلىمىزدىڭ ۇزدىك 100 برەندىن قالىپتاستىرۋ ءۇشىن ەڭبەكتەنىپ ءجۇر. جاقىن ارادا تىكەلەي وتاندىق ونىمدەردىڭ ناسيحاتىمەن اينالىساتىن «قازبيزنەس» تەلەارناسى دا اشىلادى.
«2006-جىلى مەن بالا كۇتىمىنە وراي ۇيدە وتىردىم. سول كەزدە اقشادان قىسىلىپ، جۇمىس ورنىمنان كومەك سۇراعانىمدا، ولار باس تارتتى. ارينە، ولاردى كىنالاي المايمىن. ءبىراق، بۇل جاعداي مەنىڭ تىكەلەي وسى سالاعا كەلۋىمە اسەر ەتكەنى راس.
مىسالى، مەن كەز كەلگەن ءونىمنىڭ حالىققا تانىلىپ، ساتىلىمىنىڭ ارتىپ، جارناماسىنىڭ جەر جارىپ تۇرۋىنا كۇش سالامىن. مەنىڭ جۇمىسىمنىڭ نەگىزگى كىلتى - وسىندا. كوپشىلىك مەنەن بۇدان قانداي پايدا كوردىڭ دەپ سۇراپ جاتادى. ارينە، جاسىرمايمىن، مەن ءۇشىن پايدالى.
ءبىراق، كاسىپكەرلەر مەن تاۋار وندىرۋشىلەر ءۇشىن الدەقايدا بۇل جوبانىڭ ماڭىزدى ەكەنىن ايتقىم كەلەدى. ۇلتتىق برەندتى قالىپتاستىرۋ جولىندا اتقارعان قىزمەتىمنىڭ ناتيجەسىن الداعى ۋاقىتتاردا كورەتىن بولاسىزدار»، - دەيدى ريمما تاجىبايەۆا.
جالپى، ەلىمىزدەگى تاۋار وندىرۋشىلەر شيكىزات ىزدەپ، جۇمىس كۇشتەرىن قامتاماسىز ەتۋگە كوپ كوڭىل ءبولىپ، تاۋاردىڭ ارى قارايعى جارناماسىنا ءمان بەرە بەرمەيدى. «حالىق ماركاسى» جوباسى بۇل ولقىلىقتىڭ ورنىن جاپقان ۇلكەن جوباعا اينالا ءبىلدى. ەندى، جوبا ۇيىمداستىرعان بايقاۋ اياسىندا جىل سايىن ەلىمىزدىڭ ۇزدىك تاۋارلارى انىقتالىپ، وتاندىق ءونىم وندىرۋشىلەرگە جاڭا كوكجيەك اشىلماقشى.
