07:49, 20 - قىركۇيەك 2016 | GMT +5
كوستا- ريكا 100 پايىز «جاسىل» ەنەرگياعا كوشتى
استانا. قازاقپارات - ورتالىق امەريكادا ورنالاسقان كوستا- ريكا رەسپۋبليكاسى 100 پايىز ەنەرگيانى جاڭارتىلعان ەنەرگيا كوزدەرىنەن الۋعا كوشتى. بۇل تۋرالى ەل پرەزيدەنتى لۋيس سوليس ورتالىق امەريكاداعى ەڭ ۇلكەن سۋ ەلەكتر ستانتسياسىنىڭ اشىلۋ سالتاناتىندا مالىمدەدى،
دەپ جازادى khabar.kz.
بۇعان دەيىن لاتىن امەريكاسىنداعى بۇل ەل استانادا 2017 -جىلى وتەتىن EXPO كورمەسىنە قاتىساتىنىن مالىمدەگەن بولاتىن.
ءبىر شەتىن تىنىق مۇحيتى، ەكىنشى جاعىن كاريب تەڭىزى شايىپ جاتقان كوستا- ريكادا سۋ ەلەكتر ستانسالار جۇيەسى جاقسى دامىعان. وعان قوسا ەلدە تاۋدان سارقىراپ اعاتىن وزەندەر مەن جانارتاۋ اتقىلايتىن ايماقتار دا از ەمەس. جاعالاۋدا ەسكەن جەلدە دە ەش تىنىم جوق.
تابيعاتتىڭ وسى قۇبىلىستارىن لاتىن امەريكاسىنداعى نەبارى 5 ميلليونعا جۋىق حالقى بار كوستا- ريكا بيلىگى ءتيىمدى پايدالانىپ وتىر. ەلدى ەلەكتر قۋاتىمەن قامتاماسىز ەتەتىن ينستيتۋت ماماندارىنىڭ مالىمەتىنشە، مەملەكەت ءوز- ءوزىن 100 پايىز «جاسىل» ەنەرگيامەن قامتاماسىز ەتۋگە قاۋقارلى.
