قىرعىزستان كومىر مەن ءبيدايدى 100 پايىز قازاقستاننان يمپورتتايدى

بىشكەك. قازاقپارات - قىرعىزستان كومىر مەن ءبيدايدى 100 پايىز قازاقستاننان يمپورتتايدى.

بۇل تۋرالى قىرعىز رەسپۋبيكاسىنىڭ ساۋدا-وندىرىستىك پالاتاسىنىڭ ۆيتسە-پرەزيدەنتى ريما اپاسوۆا «حاياتت ريدجەنسي بيشكەك» قوناق ۇيىندە وتكەن قىرعىز-قازاقستاندىق بيزنەس-فورۋم بارىسىندا ءمالىم ەتتى.

«قازاقستان قىرعىز رەسپۋبيكاسىنىڭ باستى ارىپتەسى. سىرتقى نارىققا شىعارىلاتىن ەلەكترو ەنەرگيانىڭ %86، ءسۇت ونىمدەرىنىڭ 96 پايىزى، جەمىس-جيدەك پەن كوكونىستىڭ 56 پايىزى، كيىمنىڭ 52 پايىزى قازاقستانعا جىبەرىلەدى. سونداي-اق، يمپورتتالاتىن ءبيداي مەن كومىردىڭ 100 پايىزى، حيميالىق زاتتاردىڭ 53 پايىزى، مينەرالدى شيكىزاتتىڭ 70 پايىزى جانە ۇننىڭ 97 پايىزى قازاقستاننان تاسىمالدانادى»، - دەدى ر. اپاسوۆا.

ەسكە سالا كەتەيىك، بيزنەس- فورۋم 7- قىركۇيەككە دەيىن سوزىلادى. شارا اياسىندا قازاقستان مەن قىرعىزستان كومپانيالارىنىڭ ەكىجاقتى كەزدەسۋلەرى وتەدى.