الماتىدا كاسىپكەرلىكتى قولداۋ كارتاسىنا 100 جوبا ەنگىزىلمەك

الماتى. قازاقپارات- 2016 -جىلدىڭ سوڭىنا دەيىن الماتى قالاسىنىڭ كاسىپكەرلىكتى قولداۋ كارتاسىنىڭ ەكىنشى بەسجىلدىعىنا ەنگىزىلەتىن جوبالاردىڭ سانى 100 گە جەتكىزىلەدى. بۇگىنگى تاڭدا كارتاعا جالپى سوماسى 172,7 ميلليارد تەڭگەگە 70 جوبا ەنگىزىلدى.

بولاشاقتا بۇل جوبالاردى جۇزەگە اسىرۋ ارقىلى 11000 جۇمىس ورنى اشىلادى.

الماتى قالاسى كاسىپكەرلىك جانە يندۋستريالدى - يننوۆاتسيالىق دامۋ باسقارماسى باسشىسىنىڭ ورىنباسارى ەرمەك سالداروۆتىڭ ايتۋىنشا، قوسىمشا ەنگىزىلەتىن جوبالار الماتىلىقتاردى جاڭا جۇمىس ورىندارىمەن جانە جاڭا ونىمدەرمەن قامتاماسىز ەتەدى. سونداي-اق، قالا بيۋدجەتىنە تۇسەتىن سالىقتىق اۋدارىمداردىڭ كولەمىن ارتتىرۋعا مۇمكىندىك بەرەدى.

«ءبىز كاسىپكەرلەرگە جەر ماسەلەسى بويىنشا رۇقسات قاعازدارىن راسىمدەۋدى تەزدەتۋ، قۇرىلىستى زاڭداستىرۋ، سونداي-اق، ەلەكتر جانە سۋمەن جابدىقتاۋ بويىنشا جان- جاقتى كومەك كورسەتىپ جاتىرمىز»، - دەدى ە. سالداروۆ.

ايتا كەتەلىك، الماتى قالاسىنىڭ كاسىپكەرلىكتى قولداۋ كارتاسىنىڭ ەكىنشى بەسجىلدىعى شەڭبەرىندە جالپى سوماسى 21,2 ميلليارد تەڭگەگە 14 جوبا قولعا الىنىپ قويىلدى. ولاردىڭ جۇزەگە اسىرۋ ارقىلى بارلىعى 1787 جۇمىس ورنى اشىلادى.

مىسالى، كاسىپكەرلىكتى قولداۋ كارتاسىنىڭ ەكىنشى بەسجىلدىعى اياسىندا «يننوۆاتسيالىق تەحنولوگيالار پاركى» ارنايى ەكونوميكالىق ايماعىندا تاياۋدا «Tecata» برەندى بويىنشا LED- اسپاپتار شىعاراتىن «DS Multimedia CA» يننوۆاتسيالىق زاۋىتى ىسكە قوسىلدى.

اۆتور: ايبوتا جاپپاربەرگەن