ەكۆادوردا ءزىلزالادان كەيىن 100 گە تارتا تۇتقىن تۇرمەدەن قاشىپ كەتتى - كەسكىن

استانا. قازاقپارات - ەكۆادوردا بولعان جەر سىلكىنىسى قۇرباندارىنىڭ سانى كۇننەن- كۇنگە ارتىپ كەلەدى.

سوڭعى مالىمەت بويىنشا، تابيعي اپاتتان 272 ادام كوز جۇمعان. قارالى تىزىمدە كولۋمبيا مەن كانادا ازاماتتارى دا بار. ال جارالانعاندار سانى 2,5 مىڭنان اسادى. جۇزدەگەن تۇرعىن ءىز-ءتۇزسىز جوعالىپ كەتكەن. ءزىلزالا كۇشى 7,8 بالعا جەتكەن.

كارلوس براۆو، جەرگىلىكتى تۇرعىن:

- بارلىعى قيراپ قالدى. اتىس- شابىس بولعانعا ۇقسايدى. مەنىڭ جاسىم 74 تە. مۇندايدى كورگەن ەمەسپىن. تۋعان قالامنىڭ مىنا كەيپىن كورىپ، قاتتى قىنجىلىپ وتىرمىن.

ەل ابدىراپ جاتقاندا اپاتتى ءساتتى پايدالانعان 100 گە تارتا جازاسىن وتەۋشى مانابي پروۆينسياسىندا تۇرمەدەن قاشىپ كەتكەن. قازىر ولاردىڭ 30 عا جۋىعى عانا قولعا ءتۇسىپتى. كەيبىرى ءوز ەركىمەن كەلگەن. وزگەلەرىن ءتارتىپ ساقشىلارى ىزدەستىرىپ جاتىر. قازىر ەلدە توتەنشە جاعداي ەنگىزىلدى. ءزىلزالادان كەيىن ەلدە 180 جەراستى ءدۇمپۋى تىركەلگەن.

www.24.kz