ا. باتالوۆ: بيىل الماتى وبلىسى بەينە تىركەگىشتەرمەن 100 پايىز قامتىلادى
بۇل تۋرالى بۇگىن «مەملەكەت باسشىسىنىڭ 5 ينستيتۋتسيونالدىق رەفورماسىن جۇزەگە اسىرۋ بويىنشا 100 ناقتى قادام» ۇلت جوسپارىن جۇزەگە اسىرۋ ماسەلەلەرىنە ارنالعان باسپا ءسوز ءماسليحاتى بارىسىندا اتالعان ءوڭىردىڭ باسشىسى اماندىق باتالوۆ ءمالىم ەتتى.
ونىڭ اتاپ وتۋىنشە، ۇلت جوسپارىنىڭ «زاڭ ۇستەمدىگىن قامتاماسىز ەتۋ» ەكىنشى باعىتى بويىنشا (16-34-قادامدار) ءتورت قادام جۇزەگە اسىرىلۋدا. 30-قادامدى ورىنداۋ ءۇشىن اعىمداعى جىلدىڭ قاڭتارىندا وبلىستىق، اۋداندىق جانە قالالىق جەرگىلىكتى پوليتسيا قىزمەتتەرىنىڭ باسشىلارى تاعايىندالدى. ولاردىڭ 1976 بىرلىك كولەمدە شتاتتىق سانى، ەرەجەسى جانە قۇرىلىمى بەكىتىلدى.
«60 قىزمەتتىك اۆتوماشينا (قامتاماسىز ەتىلۋ - %100)، 166 بەينە تىركەگىش ساتىپ الىندى. جىل سوڭىنا دەيىن تاعى وسىنداي 300 قۇرىلعى جەتكىزىلەدى جانە قامتىلۋ 100 پايىزدى قۇرايدى. بۇل ماقساتتارعا 450 ميلليون تەڭگە قاراستىرىلدى. قازىرگى ۋاقىتتا وبلىستا قۇقىق بۇزۋشىلىقتىڭ الدىن الۋ بويىنشا ۆەدومستۆوارالىق كوميسسيا جۇمىس جاسايدى. قوعامدا تارتىپسىزدىكتەر مەن قۇقىق بۇزۋشىلىقتارعا «نولدىك توزىمدىلىك» قاعيداسىن قالىپتاستىرۋ جونىندەگى ءىس- شارالار جوسپارى ىسكە اسىرىلۋدا. ۋچاسكەلىك ينسپەكتورلاردىڭ حالىق جانە كاسىپورىندار مەن ۇيىمدار الدىندا 519 ەسەپتىك كەزدەسۋى وتكىزىلدى»، - دەدى ا. باتالوۆ.
وبلىس اكىمىنىڭ ايتۋىنشا، پوليتسيانىڭ اشىقتىعىن قامتاماسىز ەتۋ ماقساتىندا ىشكى ىستەر دەپارتامەنتىنىڭ جانىندا 8 ادامنان تۇراتىن كەڭەس بەرۋ- كەڭەسۋ ورگانى قۇرىلدى. ول قاۋىمداستىقتىڭ ىشكى ىستەر ورگاندارىمەن ءوزارا قارىم- قاتىناسىن، ازاماتتاردىڭ قۇقىقتارى مەن ەركىندىكتەرىن قورعاۋدى قامتاماسىز ەتەدى.
«32-قادامعا سايكەس ەلدە «قىلمىستىق قۇقىق بۇزۋشىلىقتار كارتاسى» ينتەرنەت- پورتالى ازىرلەنۋدە، وندا بارلىق قىلمىستىق قۇقىق بۇزۋشىلىقتار جاسالعاننان كەيىن ءبىر اپتادان كەشىكتىرىلمەي ەنگىزىلەتىن بولادى. ينتەرنەت- پورتالعا قوسىلۋ ءۇشىن بۇگىنگى تاڭدا وبلىس ورتالىعىنىڭ جانە بارلىق اۋدان ورتالىقتارىنىڭ گەواقپاراتتىق كارتالارى ازىرلەنىپ، باس پروكۋراتۋراعا بەرىلدى. قالعان ەلدى مەكەندەردىڭ كارتالارى كەزەڭ- كەزەڭىمەن ازىرلەنۋدە»، - دەدى ءوڭىر باسشىسى.
اۆتور: مارلان جيەمباي
