تۇركىستاندا كوپ قاباتتى 100 تۇرعىن ءۇي سالىنادى

استانا. قازاقپارات - تۇركىستاندا كوپ قاباتتى 100 تۇرعىن ءۇي سالىنادى.

بۇل تۋرالى «ايماقتىق» كوممۋنيكاتسيالار قىزمەتىندە وتكەن بريفينگتە تۇركىستان قالاسىنىڭ اكىمى الىپبەك وسەربايەۆ ءمالىم ەتتى.

باسپا ءسوز ءماسليحاتىندا «100 ناقتى قادام» ۇلت جوسپارىنىڭ ورىندالۋ بارىسىن بايانداعان تۇركىستان قالاسىنىڭ اكىمى قالاداعى جاڭادان قۇرىلعان «وتىرار» شاعىن اۋدانىنداعى 100 گەكتار جەرگە كوپقاباتتى 100 تۇرعىن ءۇي سالىناتىنىن ايتتى.

«بۇگىندە مۇندا جالپى سانى 8 كوپقاباتتى ءۇيدىڭ قۇرىلىسى جۇرگىزىلۋدە. ولاردىڭ ىشىندە ءوز قارجىلارىنا «قازاقستان يپوتەكالىق كومپانياسى» 5 قاباتتى 4 ءۇي سالسا، «وتاۋ ستروي» كومپانياسى 72 پاتەرلى 9 قاباتتى 2 ءۇيدىڭ قۇرىلىسىن سالۋدا. سونىمەن قاتار، «قولجەتىمدى باسپانا 2020» مەملەكەتتىك باعدارلاماسى اياسىندا 60 پاتەرلى 2 تۇرعىن ءۇيدىڭ قۇرىلىسى جۇرۋدە. ناتيجەسىندە، جىل سوڭىندا 6 تۇرعىن ءۇي پايدالانۋعا بەرىلەدى دەپ جوسپارلانۋدا»، - دەدى قالا باسشىسى.

ايتا كەتەيىك، تۇركىستان شاھارىندا قازىرگى تاڭدا 3600 دەن استام ازامات تۇرعىن ءۇي كەزەگىندە تۇر.

سونداي-اق، تۇرعىن ءۇي كوممۋنالدىق شارۋاشىلىعىن جاڭعىرتۋ بويىنشا وتكەن جىلى 30,1 ميلليون تەڭگە قارالىپ، كوپقاباتتى 4 تۇرعىن ءۇي مودەرنيزاتسيالاۋدان ءوتتى. ناتيجەسىندە، قالاداعى جاڭعىرتۋدان وتكەن باسپانالاردىڭ سانى 22-گە جەتتى، دەپ حابارلايدى و ق و اكىمىنىڭ باسپا ءسوز قىزمەتى.