ەلوردانىڭ 100 ستۋدەنتى تالانتتى جاستار فەستيۆالىنە قاتىسادى - فوتو، كەسكىن

استانا. قازاقپارات - بۇگىن ەلورداداعى «شابىت» سارايىندا استانا قالالىق جاستار ساياساتى ماسەلەلەرى جونىندەگى باسقارمانىڭ قولداۋىمەن «نۇر وتان» پارتياسى جانىنداعى «جاس وتان» جاستار قاناتىنىڭ ۇيىمداستىرۋىمەن «جاستار جالىنى» فەستيۆالىنىڭ سالتاناتتى اشىلۋى ءوتتى.

قازاقستان تاۋەلسىزدىگىنىڭ 25 جىلدىق مەرەيتويىنا وراي ۇيىمداستىرىلعان مادەني شاراعا ەلوردانىڭ 10 جوعارى جانە 14 كاسىپتىك-تەحنيكالىق وقۋ ورنىنان مىڭنان استام جاس قاتىسادى. ولار «ەسترادالىق ءان بايقاۋى»، «ەڭ ۇزدىك ەرىكتىلەر جوباسى»، «ەڭ ۇزدىك ۆيدەوروليك»، «ەڭ ۇزدىك ستۋدەنتتىك كلۋب»، «ۆەست»، «نە؟ قايدا؟ قاشان؟»، «حالىق ءبيى جانە قازىرگى زامانعى ءبي»، «ەڭ ۇزدىك جانكۇيلەرلەر بايقاۋى»، «اۆتورلىق وقۋ» جانە «مۋزىكا اسپاپتارىندا ويناۋ» ءتارىزدى 10 اتالىم بويىنشا باق سىنايدى.

«ءبىزدىڭ بايقاۋ جالپى قالالىق سانالادى. دەگەنمەن، «جاس وتاننىڭ» قازاقستان اتىنان باسقا دا الاڭداردا، ماسەلەن رەسەيدە وتەتىن «ستۋدەنتتىك كوكتەم» ، «شاڭحاي ىنتىماقتاستىق ۇيىمى ستۋدەنتتىك كوكتەمى» سىندى بايقاۋلارعا دەلەگاتسيا جاساقتاۋدا تاجىريبەسى بار. ياعني، قازاقستان اتىنان حالىقارالىق ارەنادا ونەر كورسەتەتىن ەڭ تالاناتتى جاستاردى ىرىكتەۋگە مۇمكىندىك بولىپ تۇر»، - دەدى «جاس وتان» جاستار قاناتى حاتشىلىعىنىڭ جەتەكشىسى ايان ساكوشيەۆ.

فەستيۆالدىڭ قورىتىندى گالا كونتسەرتى 13- ءساۋىر كۇنى كونگرەسس-حولل سارايىندا وتەدى.