استانادا وتەتىن تۋرنيرگە 100 دەن استام ءبيشى قاتىسادى

استانا. قازاقپارات - 8 -ساۋىردە تاۋەلسىزدىك سارايىندا حالىقارالىق پاراليمپيادالىق كوميتەتتىڭ قامقورلىعىمەن اربامەن بيلەۋدىڭ «Kazakhstan open 2016» ءۇشىنشى حالىقارالىق ءتۋرنيرى باستالادى.

ەلوردانىڭ رەسمي سايتىنىڭ حابارلاۋىنشا، التى مەملەكەتتەن كەلگەن قاتىسۋشىلار كلاسسيكالىق ەۋروپالىق، قىزبا لاتىنامەريكالىق باعدارلامالار، سونداي-اق، «فريستايل» ديستسيپليناسىندا جارىسقا تۇسەدى.

بيشىلەر سايىسى 8-9 -ءساۋىر كۇندەرى وتەدى. ءبي الاڭىندا اۆستريا، گرۋزيا، تايۆان، رەسەي، قىرعىزستان، گونكونگ جانە ەلىمىزدىڭ سەگىز وڭىرىنەن جينالعان بيشىلەر باعىن سىنايدى. 28 قاتىسۋشى ەلوردا نامىسىن قورعايتىن بولادى.

ق ر قازىرگى زامانعى جانە سپورتتىق ءبي فەدەراتسياسىنىڭ پرەزيدەنتى ءاليا تۇسىپبەكوۆانىڭ سوزىنە قاراعاندا، اربامەن سپورتتىق ءبي بيلەۋ ونەرى كەڭىنەن تاراپ كەلەدى، ال وسى سياقتى شارالار بۇعان ءوز سەپتىگىن تيگىزەدى.

«ءۇشىنشى جىل قاتارىنان ەلىمىزدىڭ تۇكپىر- تۇكپىرىنەن كەلگەن اربامەن بيلەيتىن بيشىلەر ەلوردادا باس قوسىپ وتىر. بيىل دەبيۋتانتتار ىشىندە اقتوبە، رۋدنىي جانە ت. ب. قالالاردان كەلگەن جۇپتار بار. فەستيۆال باعدارلاماسى دا كەڭەيتىلگەنىن ايتىپ وتكەنىمىز ءجون. وتكەن جىلدان بەرى فريستايل ديستسيپليناسى قوسىلدى، وندا رەيتينگ، ۇپاي جيناۋعا بولادى. تۋرنيردە بيىلعى ازيا چەمپيوناتىنا جولدامالار ساراپقا سالىنادى»، - دەدى ءاليا تۇسىپبەكوۆا.

ايتا كەتەيىك، دەمالىس كۇندەرى تاۋەلسىزدىك سارايىندا سەگىز جاستان اسقان بالالار اراسىندا سپورتتىق بيدەن اشىق ەل بىرىنشىلىگى وتەدى. قازاقستاننىڭ 10 وڭىرىنەن 1500 استام قاتىسۋشى كەلەدى دەپ كۇتىلۋدە. چەمپيونات اياسىندا ەرەسەكتەر اراسىنداعى بىرنەشە تۋر وتكىزىلەدى.

ال جەكسەنبى كۇنى، 10 -ساۋىردە بيدەن ازيا وليمپياداسى باستالادى، وعان 8 مەملەكەتتەن جانە ەلىمىزدىڭ وڭىرلەرىنەن 3 مىڭنان استام ءبيشى قاتىسادى.