استانادا «100 ناقتى قادام» باعدارلاماسىن ىسكە اسىرۋداعى جاستار ءرولى تالقىلاندى

استانا. قازاقپارات - استانادا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ استانا قالاسى بويىنشا دەپارتامەنتى جانە استانا قالاسى قازاقستان حالقى اسسامبلەياسى حاتشىلىعى بىرلەسىپ ەتنومادەني بىرلەستىكتەردىڭ جاستار قاناتى وكىلدەرىمەن «100 ناقتى قادام» باعدارلاماسىن ىسكە اسىرۋداعى جاستار ءرولى» تاقىرىبىندا كەزدەسۋ وتكىزدى، دەپ حابارلادى قالالىق اكىمدىكتىڭ باسپا ءسوز قىزمەتىنەن.

شاراعا استانا قالاسى قحا حاتشىلىعى قىزمەتكەرلەرى، استانالىق ەتنومادەني بىرلەستىكتەر باسشىلارى جانە جاستار قاناتى كوشباسشىلارى قاتىستى.

دەپارتامەنت وكىلدەرىمەن «كاسىبي مەملەكەتتىك اپپارات قۇرۋ» ءبىرىنشى ينستيتۋتسيونالدىق رەفورما شەڭبەرىندە ىسكە اسىرىلىپ جاتقان جوبالارعا اسا ءمان بەرىلدى.

دەپارتامەنت وكىلدەرى ءبىرىنشى ينستيتۋتسيونالدىق رەفورما شەڭبەرىندە، مەملەكەتتىك قىزمەتكە العاش كەلۋشى ۇمىتكەرلەر ءۇش كەزەڭدىك ىرىكتەۋدەن ءوتىپ، كاسىبي قىزمەتىن تەك تومەنگى لاۋازىمداردان باستاۋدى قامتيتىن مەملەكەتتىك قىزمەتتىڭ مانساپتىق مودەلىنە اۋىسۋ جوباسى تۋرالى تۇسىنىكتەمە بەردى.

سونىمەن قاتار، 2016 -جىلدان باستاپ مەملەكەتتىك قىزمەتكەرلەر ەڭبەكاقىسىن مەملەكەتتىك قىزمەتكەرلەردىڭ ناقتى جۇمىس جۇكتەمەسىن جانە ولاردىڭ جالپى مەملەكەتتىك ورگاننىڭ ستراتەگيالىق ماقساتتارىنا قول جەتكىزۋگە قوسقان ۇلەسى ەسكەرىلەتىن فاكتورلىق- بالدىق شكالا بويىنشا تولەۋگە كوشەتىندىگى تۋرالى توقتالدى. جالپى بولاشاق رەفورمالار جاستاردىڭ مەملەكەتتىك قىزمەتكە كەلۋىنە جانە ءبىلىمى مەن بىلىكتىلىگىن كورسەتۋگە جاڭا مۇمكىندىكتەر اشاتىندىعى ايتىلدى.

شارا بارىسىندا مەملەكەتتىك قىزمەتكە ءتۇسۋ، جاس ماماندارعا تولەنەتىن ەڭبەكاقى مولشەرى سياقتى سۇراقتار جاستار وكىلدەرى اراسىندا قىزىعۋشىلىق تۋدىردى.