قاراعاندى وبلىسىنداعى كوكتەمگى سۋ تاسقىنىنان زارداپ شەككەندەرگە ارنالعان 100 جاڭا ءۇي تاپسىرىلدى - فوتو

بۇل تۋرالى وبلىس اكىمىنىڭ باسپا ءسوز قىزمەتىنەن حابارلادى.
جاڭا قونىس يەلەرىن وبلىس اكىمى نۇرمۇحامبەت ابدىبەكوۆ قۇتتىقتادى.
«بۇل وقيعا قازاقستان رەسپۋبليكاسى كونستيتۋتسياسى كۇنىنە، ونىڭ 20 جىلدىعىنا كەزدەيسوق ورايلاستىرىلعان جوق. ءبىزدىڭ ەلىمىزدىڭ نەگىزگى زاڭى ازاماتتاردىڭ باسپاناعا قۇقىعىن كەپىل ەتىپ وتىر جانە بۇل اباتتاندىرىلعان ۇيلەر - وسى قۇقىقتىڭ ناقتى ىسكە اسىرىلۋىنىڭ كورىنىسى»، - دەپ اتاپ ءوتتى ايماق باسشىسى.
وبلىس اكىمى ۇيلەردى قاراپ شىقپاس بۇرىن ايماقتاعى جالپى جاعدايمەن تانىسىپ ءوتتى.
وبلىس اكىمىنىڭ ءبىرىنشى ورىنباسارى اسىلبەك دۇيسەبايەۆ جالپى العاندا وبلىس بويىنشا تاسقىن سالدارىنان 2107 وتباسى زارداپ شەككەنىن جەتكىزدى. ونىڭ ايتۋىنشا، بۇگىندە تەك 163 وتباسىعا ءۇي سالۋ كەرەك.
«وبلىستاعى تاسقىننان زارداپ شەككەن 12 اۋداننىڭ جەتەۋىندە زارداپ سالدارىن جويۋ جۇمىستارى تولىق اياقتالعان. بۇدان باسقا، بۇقار جىراۋ اۋدانىندا 100 ءۇي كەستەدەن ەرتە تاپسىرىلدى. جالپى العاندا وبلىس بويىنشا 75 مەردىگەر ۇيىم جۇمىس ىستەپ وتىر»، - دەپ اتاپ ءوتتى ا. دۇيسەبايەۆ.
قىركۇيەك ايىنىڭ باسىندا بارلىق ۇيلەردىڭ قۇرىلىسىن اياقتاۋ جوسپارلانعان.
سول كۇنى كەنتتە «مەكتەپكە جول» اكتسياسى ءوتتى. تۇرمىسى تومەن جانە كوپبالالى وتباسىلاردان، سونداي-اق تاسقىن سالدارىنان زارداپ شەككەن وتباسىلاردان شىققان 50 وقۋشى جالپى سوماسى شامامەن 900 مىڭ تەڭگەگە وقۋلىقتار مەن باسقا دا مەكتەپ قۇرالدارىن الدى.