كەڭەس وداعىنىڭ باتىرى م. عابدۋليننىڭ 100 جىلدىعىنا ارنالعان ءدۇبىرلى توي وتۋدە - فوتو

شاراعا وبلىس اكىمىنىڭ ورىنباسارى نۇرلان نۇركەنوۆ، قازاقستان رەسپۋبليكاسى پارلامەنتى سەناتىنىڭ دەپۋتاتى جابال ەرعاليەۆ، باتىردىڭ ۇرپاعى مايدان مالىك قىزى، اۋدان اكىمى اسقار مۇرات ۇلى، باسقا زيالى قاۋىم وكىلدەرى قاتىسىپ، حالقىمىزدىڭ ماڭدايىنا بىتكەن قايسار ۇلدىڭ ءومىر جولىن ەسكە الدى.
سالتاناتتى شارا باتىردىڭ ەسكەرتكىشىنە گۇل شوقتارىن قويۋ راسىمىنەن باستاۋ الدى. جينالعان كوپشىلىك الدىندا وبلىس اكىمىنىڭ ورىنباسارى نۇرلان نۇركەنوۆ باتىردىڭ ەلىنە وشپەس مۇرا قالدىرىپ قانا قويماي، سۇراپىل سوعىس جىلدارىندا وتان ءۇشىن ەرلىك كورسەتكەنىن ايتا كەلە، كەلەر ۇرپاق مالىكتەي داڭقتى بابالارىن ەشقاشان دا ۇمىتپايتىندىعىن جەتكىزدى.
توي م. عابدۋليننىڭ كىندىك قانى تامعان قويسالعان اۋىلىندا جالعاسادى دەپ جوسپارلانعان.
ەسكە سالا كەتسەك، بيىل كوكشەتاۋ قالاسىندا ۇلى جەڭىستىڭ 70 جىلدىعى مەن وتان قورعاۋشى كۇنىنە جانە كەڭەس وداعىنىڭ باتىرى، جازۋشى- عالىم، اكادەميك مالىك عابدۋلليننىڭ 100 جىلدىعىنا وراي باتىرعا ەسكەرتكىش ورناتىلعان بولاتىن.
كەڭەس وداعىنىڭ باتىرى، جازۋشى- عالىم، اكادەميك مالىك عابدۋللين 1915 -جىلى 15 -قاراشادا بۇرىنعى كوكشەتاۋ وبلىسىنىڭ زەرەندى اۋدانىنداعى قويسالعان اۋىلىندا دۇنيەگە كەلدى. 1935 -جىلى اباي اتىنداعى قازاق پەداگوگيكالىق ينستيتۋتىن ءتامامداعاننان كەيىن وتان الدىنداعى اسكەري بورىشىن وتەيدى.
ول ۇلى وتان سوعىسى باستالعاندا العاشقىلاردىڭ ءبىرى بولىپ ءوز ەركىمەن مايدانعا اتتاندى. گەنەرال ي. ۆ. پانفيلوۆتىڭ 8-گۆارديالىق ديۆيزياسىندا اعا پوليترۋك بولىپ، جاۋعا قارسى سان شايقاسقا قاتىستى. مالىك عابدۋللين - ماسكەۋ قالاسىن قورعاۋدا ەرلىگىمەن كوزگە تۇسكەن باتىر. 1942 -جىلى نوۆگورود وبلىسى حولم قالاسىنىڭ ماڭىندا بولعان ۇرىستا قازاقتىڭ ەرجۇرەك ۇلانى باسقارعان ساربازدار جاۋدىڭ ەكى تانكىسىن گراناتامەن جارىپ، 12 سولداتىن تۇتقىنعا الدى. مالىكتىڭ ءوزى جارالانسا دا، ۇرىس دالاسىنان كەتپەدى. وسى كوزسىز ەرلىگى ءۇشىن وعان كسرو جوعارعى كەڭەسى پرەزيديۋمىنىڭ جارلىعىمەن 1943 -جىلدىڭ 30 -قاڭتارىندا كەڭەس وداعىنىڭ باتىرى اتاعى بەرىلدى.
سوعىستىڭ اياعىنا قاراي باتىر قىزىل ارميانىڭ ساياسي باس باسقارماسىندا ورىس ەمەس ۇلتتاردىڭ جاۋىنگەرلەرى اراسىندا ۇگىتشى بولىپ قىزمەت اتقارادى. ءسويتىپ، شىعىستىڭ قوس جۇلدىزىنىڭ ءبىرى مانشۇك مامەتوۆاعا قازا تاپقاننان كەيىن باتىر اتاعىنىڭ بەرىلۋىنە ولشەۋسىز ەڭبەك سىڭىرەدى.
سوعىستان كەيىنگى جىلداردا دا داڭقتى جەرلەسىمىز مالىك عابدۋللين عىلىمي- پەداگوگيكالىق جۇمىستارمەن بەلسەنە اينالىسادى. 1946-1951 -جىلدار ارالىعىندا قازاق ك س ر عىلىم اكادەمياسىنىڭ ءتىل جانە ادەبيەت ينستيتۋتىندا ديرەكتورلىق، ال، 1951-1963 -جىلدار ارالىعىندا اباي اتىنداعى قازاق پەداگوگيكالىق ينستيتۋتىندا رەكتورلىق قىزمەت اتقارادى، ودان ءارى ءومىرىنىڭ سوڭعى كۇنىنە دەيىن (1973) ءتىل جانە ادەبيەت ينستيتۋتىندا فولكلور ءبولىمىنىڭ مەڭگەرۋشىسى بولادى. كسرو پەداگوگيكا عىلىمدارى اكادەمياسىنىڭ اكادەميگى بولىپ سايلانادى. ادەبيەت سالاسىنداعى عىلىمي- زەرتتەۋ كىتاپتارىمەن بىرگە، مايدان ومىرىنەن دە بىرنەشە كىتاپ جازادى.
قارۋلاس ءىنىسىنىڭ مايدانداعى ەرلىگى مەن ومىردەگى ازاماتتىق ۇستانىمىن وتە جوعارى باعالاعان تۇلعالارىمىزدىڭ ءبىرى - داڭقتى باۋكەڭ، ياعني، باۋىرجان مومىش ۇلى. الماتىدا ءوزى تۇرعان ءۇيى مەن قىزمەت اتقارعان ينستيتۋتىندا مالىك عابدۋللينگە ارنالىپ مەموريالدى تاقتا ورناتىلعان. باتىر تۋىپ- وسكەن زەرەندى اۋدانىندا مەكتەپ پەن كوشە اتتارى بەرىلگەن، سونداي- اق، ەسكەرتكىشى سومدالعان. استانا، الماتى مەن كوكشەتاۋدا كوشەسى بار جانە وبلىس ورتالىعىندا مۋزەيى جۇمىس ىستەيدى.
اۆتور: اسلان وسپانوۆ