ۇ ك پ باسشىسى بيزنەس-قاۋىمداستىقتاردىڭ «100 ناقتى قادامدى» ورىنداۋعا ءازىر ەكەنىن جەتكىزدى
«بيزنەس-قاۋىمداستىقتار بەس ينستيتۋتسيونالدىق رەفورمانى ىسكە اسىرۋعا كىرىسىپ كەتتى، كوميسسيالار مەن جۇمىس توپتارى قۇرىلىپ جاتىر. «اتامەكەن» پالاتاسىنىڭ بارلىق جۇمىس توپتارىندا بارلىق باعىتتار بويىنشا بەلسەندى تۇردە جۇمىستار جۇرگىزىلىپ جاتىر. وزدەرىڭىز بىلەسىزدەر، مەملەكەت باسشىسى اتالعان رەفورمالاردى جۇزەگە اسىرۋعا ارنالعان «100 ناقتى قادام» جوسپارىن جاريا ەتتى.
ارينە، بيزنەس-قاۋىمداستىقتار بۇل ناقتى قادامداردى بار ىنتاسىمەن قابىل الىپ، وسى قادامدار بويىنشا ءار تاراپتا جۇمىس ىستەۋگە كىرىسىپ كەتتى»، - دەپ اتاپ ءوتتى ا. مىرزاحمەتوۆ بۇگىن ورتالىق كوممۋنيكاتسيالار قىزمەتىندە وتكەن بريفينگ بارىسىندا.
ونىڭ ايتۋىنشا، ۇلت جوسپارىندا ايتىلعان كاسىبي مەملەكەتتىك اپپارات، ونىڭ بيزنەس پەن حالىققا كورسەتۋى ءتيىس ساپالى قىزمەتى كاسىپكەرلىكتىڭ قارقىندى دامۋىنا بەرىك ىرگەتاس بولادى.
«سوندىقتان ءبىز مەملەكەتتىك اپپاراتتىڭ ەل حالقى مەن كاسىپكەرلەرىنە كورسەتەتىن قىزمەتىن ساپالى ءارى تياناقتى جاساعانىن قولدايمىز»، - دەدى ا. مىرزاحمەتوۆ.
اۆتور: ءابۋ-اسقار مەكەش ۇلى