الماتىدا ءداستۇرلى «گۇل قالا» فەستيۆالىندە 100 دەن استام كومپانيا جاسىل جەلەكتەرىن ۇسىندى - فوتو

 الماتى. قازاقپارات - 23 - مامىر كۇنى الماتىدا ق ر تۇڭعىش پرەزيدەنتى ساياباعىندا «الماتى - گۇل قالا» مەرەيلى فەستيۆالى ءوتتى. مادەني شارا وسىمەن بەسىنشى جىل قاتارىنان وتكىزىلىپ كەلەدى.

 مەرەكەنىڭ باستى كوركى كولەمى 450 شارشى مەتردى قامتىعان الىپ گۇل كىلەمى بولدى. دەكوراتيۆتى كىلەم مىڭداعان گۇلدەر مەن 30 ءتۇرلى تابيعي ماتەريالدان جاسالعان.

 «قالا تۇرعىندارىن گۇل ءوسىرۋ مەن جاسىل جەلەكتى كۇتۋگە باۋليتىن بۇل فەستيۆال وسىمەن بەسىنشى جىل وتكىزىلىپ وتىر. وسى ۋاقىت ارالىعىندا قالاداعى گۇل كىلەمىنىڭ كولەمى ءۇش ەسە ارتىپ، 200 مىڭ شارشى مەترگە جەتتى. 16 ساياباق پەن سكۆەرلەر جوندەلدى. بيىل تاعى ءۇش ساياباق جوندەۋدەن وتەدى»، - دەدى قالا اكىمىنىڭ ورىنباسارى زاۋرەش امانجولوۆا.

 ونىڭ ايتۋىنشا، بيىل الماتىدا تۇڭعىش رەت ۆەرتيكالدى كورىكتەندىرۋ تەحنولوگياسى قولدانىلدى. قالاداعى ۆەرتيكالدى وسكەن گۇلدەردىڭ بيىكتىگى 12 مەترگە دەيىن جەتەدى. سونداي- اق ءداستۇرلى كوگالداندىرۋ تەحنولوگياسىنان ەكسكليۋزيۆتى كومپوزيتسيالارعا كوشۋدە.

 «الماتى قالاسىنىڭ بۇدان بىلاي دا ءارى ادەمى، ءارى جاسىل جەلەگى جايقالعان تازا، جايلى قالا بولىپ قالا بەرۋى ءۇشىن ءار تۇرعىن ءوز ۇلەسىن قوسۋى كەرەك»، - دەدى ز. امانجولوۆا.

 بيىلعى جارمەڭكەگە 100 دەن استام كومپانيا قاتىستى. كورمەگە قويىلعان گۇلدەردىڭ سان تۇرلىلىگىنەن كوز تۇنادى.

 قالا اكىمىنىڭ ورىنباسارى ەڭ ۇزدىك فلوريستى ماراپاتتادى. ايتا كەتەيىك، بايقاۋدا 30 ۇمىتكەر باق سىناعان بولاتىن.

 بيىلعى بايقاۋدا جەڭىستى اۋەزوۆ اۋدانىنىڭ تۇرعىنى ەكاتەرينا كوزلوۆا يەلەندى. سونداي- اق بالالار اراسىنداعى بايقاۋدىڭ دا جەڭىمپازدارى انىقتالدى.

كەشكە دەيىن جالعاسقان مادەني شاراعا 180 مىڭنان استام ادام قاتىستى.