باتىس قازاقستاندىق سۋديالار «100 قادامدى» تالقىلادى

ورال. قازاقپارات - باتىس قازاقستان وبلىستىق سوتىندا وبلىستىق، قالالىق سوتتاردىڭ سۋديالارى مەن قىزمەتكەرلەرىنىڭ قاتىسۋىمەن «نۇر وتان» پارتياسىنىڭ ХVІ سەزىندە ەلباسى ن. ءا. نازاربايەۆ ۇسىنعان بەس ينستيتۋتتىق رەفورمانى جۇزەگە اسىرۋدىڭ 100 قادامىن تالقىلاۋعا ارنالعان جيىن ءوتتى.

ب ق و سوتىنىڭ باسپا ءسوز قىزمەتىنەن تۇسكەن مالىمەتكە قاراعاندا، جيىندى اشقان وبلىستىق سوتتىڭ ءتوراعاسى بەك امەتوۆ بەس ينستيتۋتتىق باعدارلامانى جۇزەگە اسىرۋدا سوتتاردىڭ الدىندا تۇرعان مىندەتتەرگە جان-جاقتى توقتالدى.

مۇنان كەيىن بەس باعىت بويىنشا «ەكونوميكالىق باعدارلامالاردى ساپالى جۇزەگە اسىرۋدى جانە مەملەكەتتىك قىزمەتتەردى ۇسىنۋدى قامتاماسىز ەتەتىن قازىرگى زامانعى، كاسىبي جانە اۆتونوميالى مەملەكەتتىك اپپاراتتى قالىپتاستىرۋ» جونىندە باتىس قازاقستان وبلىستىق سوتى كەڭسەسىنىڭ باسشىسى ەرعالي ايتپاي، «ەكونوميكالىق ءوسىم ءۇشىن نەگىز بولاتىن زاڭنىڭ ۇستەمدىگىن قامتاماسىز ەتۋ» تۋرالى وبلىستىق سوتتىڭ قىلمىستىق ىستەر جونىندەگى اپەللياتسيالىق سوت القاسىنىڭ ءتوراعاسى مەيرامبەك ناعاشىبايەۆ، «يندۋستريالاندىرۋ جانە ءارتاراپتاندىرۋعا نەگىزدەلگەن ەكونوميكالىق وسىمگە» قاتىستى وبلىستىق سوتتىڭ ازاماتتىق جانە اكىمشىلىك ىستەر جونىندەگى اپەللياتسيالىق سوت القاسىنىڭ ءتوراعاسى باقىتبەك بەگاليەۆ، « بولاشاعى ءبىرتۇتاس ۇلت» ماسەلەسىنە بايلانىستى باتىس قازاقستان وبلىستىق سوتىنىڭ سۋدياسى ەسەنباي بورانبايەۆ، «ترانسپارەنتتى جانە ەسەپ بەرۋشى مەملەكەت» جايىندا وبلىستىق سوتتىڭ سۋدياسى عيزاتوللا قىرىقبايەۆ باياندامالار جاسادى.

اۆتور: ەلجان ەرالى